Osmani pritet nga homologu i saj portugez: Do të forcojmë edhe më tej lidhjet mes Kosovës dhe Portugalisë

Presidentja e Kosovës, Vjosa Osmani po qëndron në Lisbonë të Portugalisë, ku është pritur nga homologu i saj Marcelo Rebelo de Sousa.

Vizita e saj përkon me 15 vjetorin e njohjes së Kosovës nga Portugalia dhe lidhjes së marrëdhënieve diplomatike ndërmjet dy shteteve.

Osmani në një postim në “X” ka falënderuar presidentin portugez për pritjen e ngrohtë.

“Këtë vit ndërsa vendet tona shënojnë 15 vjetorin e marrëdhënieve diplomatike, ne riafirmojmë angazhimin tonë të përbashkët për të forcuar më tej lidhjet dhe bashkëpunimin tonë”, ka shkruar Osmani.

Në njoftimin për media nga Zyra e Presidentes u tha se Osmani ka theksuar se e sheh Portugalinë si një shtet mik brenda Bashkimit Evropian dhe më gjerë, ndaj shpreson në mbështetje të mëtejme për anëtarësimin e Kosovës në organizata ndërkombëtare.

“Në këtë kontekst Presidentja ka falënderuar Portugalinë për mbështetje në procesin e liberalizimit të vizave dhe për anëtarësimin në Këshillin e Evropës, si dhe ka shfaqur shpresën se Portugalia do të përkrahë edhe dhënien e statusit kandidat në BE per Republikën tonë”, thuhet në njoftim.

Një pjesë e takimit iu kushtua zhvillimeve të fundit politike dhe të sigurisë në Kosovë.

Osmani e informoi homologun De Sousa dhe për zhvillimet e fundit në vend, si dhe mbi aktin e agresionit të Serbisë kundër Republikës së Kosovës më 24 shtator, me ç’rast, potencoi rëndësinë e sjelljes para drejtësisë në Kosovë të grupit paramilitar serb dhe adresimin e përgjegjësisë së Serbisë në destabilizimin e Kosovës dhe rajonit.

“Presidentja poashtu potencoi se në procesin e dialogut me Serbinë, Kosova është palë konstruktive dhe se përmbyllja e këtij procesi përmes njohjes së ndërsjellë është e vetmja rrugë që do të sjellë paqe afatgjate në rajon. Në këtë takim, Presidentja Osmani dhe presidenti De Sousa kanë diskutuar edhe mundësitë për thellimin e bashkëpunimit të sfera të interesit të dyanshëm”, thuhet në njoftim.

Osmani ka udhëtuar dje drejt Portugalisë, ku do të jetë folëse në Web Summit i cili konsiderohet ngjarje kryesore e teknologjisë në botë. /Telegrafi/

Grateful for the warm welcome by Portuguese President Marcelo Rebelo de Sousa in Lisbon today.

This year, as our countries mark 15 years of diplomatic relations, we reaffirm our shared committment to further bolstering our ties and cooperation. 🇽🇰🇵🇹 pic.twitter.com/6xAwyKtfoV

— Vjosa Osmani (@VjosaOsmaniPRKS) November 15, 2023