Osmani: Gashi të tërheq deklaratën për gjuhën shqipe

Ish-ministri i Jashtëm, Bujar Osmani ka kërkuar që kryetari i Kuvendit, Afrim Gashi të tërheq deklaratën në lidhje me gjuhën shqipe.

“Në karrierën time politike dhe në gjithë eksperiencën që kam pasur në vend dhe në botë, nuk kam dëgjuar kurrë një deklaratë më poshtëruese, të pasaktë dhe servile se kjo për gjuhën shqipe.

Deklarata e tillë është një fyerje e rëndë për popullin shqiptar dhe një mohim i realitetit kushtetues të Republikës së Maqedonisë së Veriut.

I bëj thirrje Gashi që menjëherë ta tërheqë këtë deklaratë dhe t’i kërkojë falje publike qytetarëve shqiptarë.

Lexo po ashtu Gashi tha se gjuha shqipe nuk është zyrtare, por e përkthyer – Fronti Europian kërkon dorëheqjen e tij

Një figurë që përfaqëson një institucion të lartë duhet të mbrojë dinjitetin e popujve dhe komuniteteve dhe të respektojë të drejtat e të gjithë qytetarëve, jo të bëhet instrument i diskursit përçarës dhe denigrues”, shkruan Osmani në profilin e tij në Facebook.

Kryetari i Kuvendit, Afrim Gashi më herët deklaroi se gjuha shqipe në Maqedoninë e Veriut nuk është zyrtare dhe se është gjuhë e përkthyer.

“Gjuhë e vetme zyrtare me të cilën shteti komunikon dhe institucionet flasin mes vete është gjuha maqedonase. Gjuha shqipe është gjuhë e përkthyer. Unë po ju them të vërtetën ashtu siç është, nuk është diçka që mua më pëlqen, unë e kam kundërshtuar”, deklaroi Afrim Gashi./Telegrafi/