Opozita jep mbështetjen për amnistinë penale në Shqipëri, propozon disa ndryshime

Grupi i ish-kryeministrit Sali Berisha, të njohur edhe si Rithemelimit, ka shprehur këtë të mërkurë mbështetjen për projektligjin e amnistisë penale.

Krahas mbështetjes së dhënë për kalimin e ligjit ditën e enjte, grupi nën drejtimin e Gazment Bardhit propozon që ligji të përjashtojë nga dënimi të gjithë protestuesit e ndaluar në tubime përpara datës 31 mars 2024.

Gjithashtu kërkohet rritja e përfitimeve nga amnistia qoftë në drejtim të uljes së dënimit me 2 vite për gratë dhe 1.5 vite për burrat, qoftë në drejtim të datës së dënimit, fillimit të hetimeve apo kryerjes së veprës penale deri në 31 Mars 2024, nga 31 Janari 2024.

Gjithashtu kërkohet lënia jashtë amnistisë të zyrtarëve të dënuar me vendim të Gjykatës së posaçme.

Vendimet u morën gjatë mbledhjes së grupit parlamentar të Rithemelimit të mbajtur këtë të mërkurë në selinë blu.

Ndryshimet e kërkuara:

-Grupi Parlamentar i Partisë Demokratike ka propozuar që të përjashtohen nga vuajtja e dënimit dhe ndjekja penale të gjithë personat e gjykuar apo hetuar për vepra penale të kryera gjatë grumbullimeve dhe manifestimeve të kryera deri në datën 31 Mars 2024, pavarësisht datës së regjistrimit të tyre.
-Grupi Parlamentar i Partisë Demokratike ka propozuar përjashtimin nga amnistimi, qoftë sa i përket vuajtjes së dënimit, uljes së dënimit apo ndjekjes penale, të gjithë funksionarët e lartë të hetuar dhe/ose gjykuar nga strukturat e posaçme antikorrupsion apo që janë subjekt i deklarimit të pasurisë, si deputetë apo kryebashkiakë.
-Grupi Parlamentar i Partisë Demokratike ka propozuar një rritje të masës së përfitimeve nga amnistia, qoftë në drejtim të uljes së dënimit me 2 vite për gratë dhe 1.5 vite për burrat, qoftë në drejtim të datës së dënimit, fillimit të hetimeve apo kryerjes së veprës penale deri në 31 Mars 2024, nga 31 Janari 2024 qê parashikonte versioni aktual i projektligjit.