OBRM-PDUKM: LSDM dhe BDI e kanë rritur çmimin e autostradës Kërçovë-Ohër për 200 milionë euro

Për të ecur përpara duhet të kemi informacion për të kaluarën, ose më mirë se çfarë na la qeveria e LSDM-së. Institucionet e rrënuara që po fundosen për shkak të korrupsionit dhe krimit është gjendja e lënë nga qeveria e LSD-së dhe BDI-së, thonë nga OBRM-PDUKM, përcjell Telegrafi Maqedoni.

“Se i vetmi prioritet i qeverisjes së kaluar të LSD-së dhe BDI-së ishin tenderët e diskutueshëm, shihet edhe nga tenderi për autostradën Kërçovë-Ohër. Faktet thonë se BDI dhe LSD kanë pasur prioritet manipulimin e tenderëve, jo investimet kapitale dhe ndërtimin e infrastrukturës.

Kjo konfirmohet nga Raporti i Entit Shtetëror të Auditimit. Autostrada Kërçovë-Ohër edhe pse ishte parashikuar se sa do të kushtonte, papritur u shtrenjtua për 200 milionë euro dhe pa asnjë detaj. Ose kur bëhet fjalë për manipulimin e tenderëve, kjo ndodh në shumicën e tyre”, akuzojnë nga OBRM-PDUKM.

Karakteristikë e tenderëve të Qeverisë së LSD-së dhe BDI-së, shtojnë nga atje, është performanca e vonuar dhe rritja e kostove, të cilat rënduan buxhetin e shtetit./Telegrafi/