Obama: Clinton, zgjedhja më e mirë për Shtëpinë e Bardhë

Presidenti amerikan, Barack Obama e ka lavdëruar Hillary Clintonin si kandidate jashtëzakonisht të kualifikuar për presidencën amerikane, duke thënë se kandidatura e Donald Trumpit nuk i afrohet asaj të Clintonit në garën për Shtëpinë e Bardhë.

“Asnjëherë nuk ka pasur një burrë, apo grua, unë apo Bill Clinton, asnjë person që ka qenë i kualifikuar se sa Hillary Clinton për të shërbyer si president i Shteteve të Bashkuara”, u ka thënë Obama delegatëve demokratë në Konventën e tyre në Filadelfia.

Në një fjalim të mbushur me optimizëm, Obama ka folur për të ardhmen e ndritshme për vendin që Clinton do e sigurojë nëse fiton zgjedhjet e 8 nëntorit.

Ai e ka quajtur Clintonin, e cila formalisht e ka pranuar nominimin një ditë më parë si “të aftë…dhe të gatshme të bëhet komandantja e përgjithshme” e Shteteve të Bashkuara, duke thënë se historia e gjatë duke shërbyer në poste publike, përfshirë edhe atë të Sekretares së Shtetit dhe të Sentaores, e ka bërë atë më të kualifikuar se të gjithë për Shtëpinë e Bardhë.

“Asgjë nuk të përgatit mjaftueshëm për kërkesat që ekzistojnë kur në Zyrën Ovale”, ka thënë Obama.

“Mund të lexosh për këtë. Mund të studiosh. Por, derisa ulesh në atë tavolinë, nuk e di se si është të menaxhosh një krizë globale apo të dërgosh të rinj në luftë. Hillary, megjithatë ka qenë në atë dhomë; ajo ka qenë pjesë e këtyre vendimeve.”

Clitnon e ka elektrizuar sallën kur ka dalë në skenë që të përshëndetet me Obamën në përfundim të fjalimit të tij, duke e përqafuar presidentin në natën e tretë të konventës. Kësaj radhe përpos presidentit Obama, fjalime kanë mbajtur edhe zëvendëspresidenti, Joe Biden, ish kryetari i New Yorkut, Michael Bloomberg dhe kandidati për zëvendës president, Tim Kaine nga Virxhinia.

“Këtë vit, këto zgjedhje, ju kërkoj që të na bashkoheni, të hidhni poshtë cinizmin dhe të mos e pranoni frikën… të zgjedhni Hillary Clinton si presidenten e ardhshme të Shteteve të Bashkuara”, janë fjalët me të cilat Obama e ka përfunduar fjalimin e tij.

Presidenti dhe të tjerët që mbajtën fjalime e kanë kritikuar ashpër Donald Trumpin, kandidatin republikan për president amerikan dhe biznesmenin e parë i cili asnjëherë nuk ka pasur post publik. Ata e kanë e quajtur atë si nxitës të frikës që bën premtime të thata dhe ka vizion të errët për vendin.

Biden e ka quajtur Trumpin, “një person që kërkon të mbjellë ndarjen në Amerikë për përfitime të veta, dhe mungesë rregulli në botë” dhe si “person që ngatërron uluritjet me fuqinë”.

Trump e ka komentuar tonin optimist të natës së tretë të Konventës, duke shkruar në Twitter se vendi po duket “i mrekullueshëm për miliona njerëz që jetojnë në varfëri, dhunë dhe dëshpërim”.

Disa persona që mbajtën fjalim gjatë natës së tretë të Konventës e kanë akuzuar Trumpin si shumë miqësor ndaj Rusisë, lidhjet e të cilës me Uashingtonin kanë rënë në nivelin e Luftës së Ftohtë prejse Rusia me forcë e aneksoi gadishullin ukrainas të Krimesë në vitin 2014 dhe për shkak të përkrahjes që ajo u jep separatistëve në Ukrainën lindore.

Kritikat pasojnë rrjedhjen masive të komunikimeve të brendshme të zytarëve demokratë që sipas fushatës së Clintonit janë ndërhyrje kibernetike të kryera nga Rusia. Rrjedhja e emaileve në media ka zemëruar përkrahësit e rivalit partiak të Clintonit, Bernie Sanders, pasi këto komunikimet tregonin se si zyrtarët partiakë e kanë favorizuar kandidaturën e Clintonit.

Ish Sekretari i Mbrojtjes dhe ish Shefi i Agjencisë Qëndrore të Inteligjencës (CIA), Leon Panetta gjatë Konventës ka thënë se Trump “edhe njëherë” është duke e marrë “anën e Rusisë”, duke sugjeruar se Moska duhet të gjejë emailet e humbura të Clintonit.

Trump ka thënë se ai do të bëjë përpjekje që të përmirësojë marrëdhëniet më Moskën nëse zgjidhet lider i vendit. Ai, më 27 korrik ka thënë se në rast të fitores në zgjedhje, do të mund të hiqte sanksionet kundër Moskës që janë vendosur nga SHBA-të si pasojë e aneksimit të Krimesë.

Biden, ndërkohë e ka portretizuar Trumpin si person që ka simpati për “dikatorët”, duke cituar komentet pozitive që kandidati republikan i ka bërë për presidentin rus, Vladimir Putin.

Biden ka shtuar se Trump do e bëjë Amerikën më pak të sigurt.

“Ne nuk mund të zgjedhim një person që ofendon aleatët tanë, derisa përkrah diktatorë si Vladimir Putin”, ka komentuar Biden, transmeton Rel.

Hillary Clinton shënohet në histori si kandidatja e parë femër që është zgjedhur për të garuar në zgjedhjet presidenciale në politikën amerikane.

Ajo pritet të mbajë fjalim sonte vonë në natën e fundit të konventës.