​OAK paraqet rekomandimet e saj në Komisionin për Punë të Jashtme dhe Diasporë

Problemet e bizneseve me ambasadat, specifikisht kërkesa për rritjen e komunikimit reciprok, mungesa e atasheve ekonomik, tërheqja e investimeve të huaja nga Diaspora, krijimi i kushteve dhe ofertave për investitorët si dhe problemet me licensimin e pagesave ndërkombëtare në mesin e të cilave edhe PayPal, ishin çështjet kryesore të cilat u diskutuan në takimin mes përfaqësuesve të OAK-së dhe Kryetarit të Komisionit për Punë të Jashtme dhe Diasporë, Haki Abazi.

Sekretari i Bordit të OAK-së Diamant Elshani shpalosi aktivitetet dhe prioritetet e OAK-së. Elshani, theksoi se OAK ka analizuar Planin Qeverisës dhe përshëndet disa nga pikat e parapara në mesin e të cilave pikën për emitimin e bono thesarit dedikuar mërgatës, krijimin e Bankës Zhvillimore, duke shtuar që e shohin si shumë të nevojshme pikën që parasheh rivlerësimin e MSA-së si dhe e përkrahin liberalizimin e tregut të punës me Shqipërinë.

Elshani shprehu gatishmërinë e OAK-së për të dhënë kontribut në aspektet profesionale që ndërlidhen në fushat me interes reciprok.

Përderisa Kryetari i Komisionit për Punë të Jashtme dhe Diasporë, Haki Abazi falënderoi OAK-në për takimin konstruktiv duke theksuar se janë të hapur për bashkëpunim. Abazi poashtu theksoi se çdo kërkesë e odës që i përket këtij Komisioni, do të merret në shqyrtim.

Për sa i përket prezantimit të Planit Qeverisës, Elshani theksoi se ka shumë pika në të cilat mund të ndërlidhen dhe të kontribuojnë si Odë. /Telegrafi/