Nokia rrugës për të vendosur rrjetin e parë celular në Hënë

Nokia doli nga tregu i telefonave shumë kohë më parë, por kompania finlandeze mbetet lider në teknologjinë e infrastrukturës së telekomunikacionit.

Ajo ka qenë dhe vazhdon të jetë në krye të inovacionit të rrjetit celular, kështu që nuk është çudi që së shpejti do të bëhet kompania e parë që do të vendosë një rrjet 4G në Hënë.

Bëhet e ditur se si pjesë e misionit Intuitive Machines-2 (IM-2) në polin jugor hënor, Nokia do të vendosë rrjetin e parë celular në satelitin e Tokës, i cili do të ndihmojë në hedhjen e bazave për eksplorimin e ardhshëm të hapësirës dhe misionet me ekuipazh.

Disa ditë më parë, anija Intuitive Machines Athena, që mbante rrjetin hënor të Nokias, u ngrit në një raketë SpaceX Falcon 9, shkruajnë mediat e huaja, përcjell Telegrafi.

Rreth një javë pas nisjes, Athena pritet të hyjë në orbitën e ulët hënore dhe pas përfundimit të revolucioneve të shumta rreth Hënës, Athena përfundimisht do të ulet dhe misioni IM-2 do të fillojë.

Ndërsa pajisjet që Nokia planifikon të vendosë në Hënë janë një rrjet 4G/LTE që është projektuar posaçërisht për kërkesat unike të një misioni hënor.

Qëllimi i tij kryesor është të lidhë Athena me dy automjete në sipërfaqen hënore, një rover MAPP dhe një dron Micro Nova Hopper.

Menjëherë pas uljes në Hënë, Nokia do të aktivizojë LSCS.

Kompania finlandeze do të përdorë lidhjen direkte në Tokë të Intuitive Machine për softuerin e monitorimit në distancë dhe më pas do të fuqizojë “rrjetin në një kuti” (NIB) të integruar në Athena.

Pas të gjitha kontrolleve, NIB do të krijojë një lidhje të drejtpërdrejtë celulare me modulin e pajisjes në roverin MAPP, i cili do të jetë ende në Athena.

Sipas Nokia, kjo do të jetë thirrja e parë celulare në Hënë.

Më pas, NIB do të lidhet me automjetin e dytë hënor, Micro Nova Hopper.

Ndërsa roveri MAPP dhe Hopper eksplorojnë sipërfaqen hënore, Nokia do të monitorojë dhe vlerësojë performancën e rrjetit dhe do të bëjë rregullimet e nevojshme.

Raportohet se të gjitha të dhënat e mbledhura do të përdoren nga Nokia për të përmirësuar dizajnin dhe vendosjen e rrjetit për misionet e ardhshme.

Ndryshe, përveç misionit të tij kryesor, qëllimi për Sistemin e Komunikimit të Sipërfaqes Hënore të Nokias (LSCS) është të demonstrojë se teknologjia celulare mund të përdoret për komunikime në misionet e ardhshme hapësinore, kështu që këtu shpresojmë që gjithçka të shkojë sipas planit. /Telegrafi/