Nitaj: Zgjidhja e problemit ishte e lehtë, interesat e një grushti matrapazësh “dojnë me e ba llugë”

Deputeti i Aleancës për Ardhmërinë e Kosovës (AAK), Muharrem Nitaj ka thënë se opozita po e bojkoton një proces që e kanë kërkuar tash e sa kohë.

Nitaj përmes një shënimi në Facebook ka thënë se është për keqardhje pse nuk po mund të merremi vesh për një proces kaq të rëndësishëm për vendin!

Deputeti i koalicionit qeverisës ka thënë ndër të tjera se “fatkeqësisht në sipërfaqe kanë dalë interesat e një grushti matrapazësh që “dojnē me e ba llugë”!”.

Postimi i plotë
Ka qenë kërkesë e vazhdueshme që Qeveria të marrë rol udhëheqës në dialogun me Serbinë dhe pikërisht kur ajo e nxorri propozimin për ekipin e bisedimeve, Opozita dhe Lista Serbe e bllokuan atë që e kanë kërkuar vet.

Është për keqardhje pse nuk po mund të merremi vesh për një proces kaq të rëndësishëm për vendin!

Edhe propozimi i Qeverisë, edhe propozim-rezoluta e LDK-së, kanë mundur të votoheshin fare kollaj, sepse qëndrimi ynë për territorin është akoma më i vendosur se sa qëndrimi i Opozitës, por fatkeqësisht në sipërfaqe kanë dalë interesat e një grushti matrapazësh që “dojnē me e ba llugë”!

Askush nuk mund t’i ikë përgjegjësisë për gjendjen e krijuar dhe heret a vonë do të merret vesh se kush dhe për interesa të kujt ka punuar. /Telegrafi/