Nissan X-Trail është një ndër SUV më të shitur në gjithë botën

Segmenti i makinave SUV ka qenë i shumë konkurrues edhe në vitin 2016, qoftë në linjën e modeleve kompakt, crossover ose SUV-ve të vërtetë. Ky segment kishte rritjen më të shpejtë në nivel global në 2016 me shitjet rekorde prej 27.1 milionë njësive.

Nga shitjet e përgjithshme të segmenteve të ndryshme të makinave në botë në vitin 2016, segmenti i SUV u rrit me 20.2 përqind dhe mori pjesë në treg me 26 përqind. Ka pasur një luftë intensive për renditjen më të lartë në SUV-të më të shitura në botë në vitin 2016.

Në këtë mes është dalluar modeli i Nissan, X-trail, i cili është lider edhe brenda grupit dhe aleancës Nissan-Renault, sepse i njëjti vazhdimisht është në mesin e Top 5 SUV-të më të shitur në botë. Në fakt, Nissan ka arritur të shesë mbi 412,729 njësi të këtij modeli, krahasuar me 382,082 njësi sa kishte shitur një vit më pak, përkatësisht në 2015.

Nissan X-Trail është zbuluar për të parën herë në vitin 2000, dhe ky model vazhdimisht është radhitur si njëra nga makinat më të shitura të kompanisë. X-Trail ofrohet me 140bhp 2.0 dhe 228bhp me motorin në 2.5 kubik. Megjithatë, ka edhe një variant me 130bhp në 1.6, ndërsa modeli hybrid i X-Trail tashmë ofrohet në Japoni.

Vitin e kaluar, Nissan – prodhuesi i madh aziatik që është në aleancë me Renault, ka filluar shitjen dhe përfaqësinë e saj zyrtare në Kosovë, në një ngjarje të madhe inaguruese, në të cilën është thënë se të gjitha modelet e Nissan do të ofrohen edhe në tregun kosovar. Së fundmi, në panairin e parë të veturave në Prishtinë është prezantuar modeli sportiv i Nissan, “bisha e rrugës” – Nissan GT-R, si dhe Nissan Micra, në mesin e modeleve tjera të shumta që janë shfaqur zyrtarisht në këtë ngjarje, nga përfaqësuesi i Nissan – AutoMita, që mbulon tregun tonë për Nissan.