Nga Ismajli te Dërmaku, Muja dhe Daku, Bajram Shala tregon prapaskenat e largimit të futbollistëve nga Kosova për t’iu bashkuar Shqipërisë

Menaxheri i Kombëtares së Kosovës, Bajram Shala, ka rrëfyer një histori interesante në podcastin “Arena e Yjeve” në Telegrafi për largimin e futbollistëve nga Kosova për t’iu bashkuar Shqipërisë.

Lojtarë si Ardian Ismajli, Kastriot Dërmaku, Arbnor Muja dhe Mirlind Daku janë shembujt e fundit të atyre që vendosën të përfaqësojnë ‘Kuqezinjtë’.

“E vërteta e largimeve të para ja unë iu tregoj. Ardian Ismajli për herë të parë ekipit i është grumbullu për ndeshjen me Finlandën në shtator të vitit 2016. Ardian Ismajli është një super futbollist dhe kushdo që flet ndryshe nuk kupton nga futbolli ose flet për çfarëdo inati tjetër”.

“Ardian Ismajli e di shumë mirë cila ka qenë situata në klubin e vet në Kroaci, s’ka qenë një prej më të mirave të mundshme, Kosova e ka marrë dhe i ka besuar”.

Shala tregon se si krisjet e para mes Ismajlit dhe Kosovës nisën kur përzgjedhësi Albert Bunjaku kishte vendosur ta lë atë në tribunë për sfidën ndaj Finlandës së bashku me Benjamin Kolollin.

“Dy lojtarë që kanë përfunduar në tribunë kanë qenë Ardian Ismajli dhe Benjamin Kololli me vendim të trajnerit dhe aty ka filluar pakënaqësia e parë e Ardianit”.

Në vazhdim ai deklaron se ka pasur një bisedë edhe mes Bernard Challandes dhe Ismajlit me këtë të parin që është munduar ta bindë lojtarin se është pjesë e planeve të tij.

Ndërkohë, sa i përket largimit të Arbnor Mujës, Shala tha se nuk mund të jap ndonjë përgjigje pasi nuk ka qenë prezent në takimin që lojtari e kishte pasur me përzgjedhësin e atëhershëm, Alain Giresse.

“Për rastin e Arbnor Mujës ka folur selektori Giresse, çfarë ka ndodhur në takimin mes tyre nuk mund të flas sepse nuk nuk kam qenë prezent pastaj Arbnori ka thënë publikisht se nuk është ashtu”.

“Unë nuk mund t’i jap kahje në asnjërën anë në këtë situatë, çfarë mund të them është se Arbnori ka qenë shumë i pakënaqur pas ndeshjes me Izraelin për shkak se nuk ka luajtur”.

“Ai më tha se dua t’i kërkoj sqarim selektorit mandej ka folur me selektorin, imagjinoni, një lojtar që ka luajtur për herë të parë me ekipin, bën zhurmë pse nuk po luaj. Një lojtar të cilin Kosova U21 e ka përkrahur në momentet e tij më të vështira të karrierës”, shtoi Shala ndër të tjerash.

Nëse dëshironi që ta ndiqni podcastin e plotë me mysafirin e ftuar, më poshtë gjeni linkun e YouTube.

Këtë podcast mund ta ndiqni edhe në TV Dukagjini çdo të shtunë nga ora 18:10, ndërsa nuk do të ishte i mundur pa përkrahjen e sponsorëve Patos dhe DentFix. /Telegrafi/