Nesër rinis Superliga e Maqedonisë, xhiron e hap ndeshja Gostivari – Vardari

Superliga e Maqedonisë së Veriut në futboll do të rinis këtë fundjavë, ku në program është xhiroja e 19-të.

Këtë xhiro e hap dueli Gostivari – Vardari që do të luhet të shtunën në stadiumin e qytetit të Gostivarit nga ora 14:00. Skuadra shqiptare e mbylli gjysmësezonin vjeshtor në pozitën e pestë me 24 pikë, ndërsa nesër shihet favorit kundrejt ekipit të fundit në renditjen tabelare. Kjo do të jetë ndeshja hapëse dhe e vetme që do të zhvillohet të shtunën, teksa pesë përballjet tjera janë në program të dielën.

Në stadiumin e Çairit do të ketë takim ndërmjet dy ekipeve shqiptare, me Shkupin që pret Voska Sportin. Në kryeqytet gjithashtu do të zhvillohen edhe dy ndeshje tjera interesante, me Shkëndijën e Tetovës që do të përballet me Makedonija Gjorçe Petrovin, ndërsa kampionët në fuqi, Struga Trim Lum do të luajnë në transfertë me Rabotniçkin.

Në program të ditës së diel gjithashtu janë edhe dy ndeshjet tjera si Sileksi – Brera dhe Bregallnica – Tikveshi.

Të gjitha sfidat e xhiros së 19-të në Superligën e Maqedonisë së Veriut luhen në termin të njejtë, duke nisur nga ora 14:00./Telegrafi/