Nënshkruhet memorandum mirëkuptimi mes distrikteve rotariane Shqipëri-Kosovë dhe Egjipt

Guvernatori i Distriktit Rotarian 2485 Shqipëri-Kosovë, Butrint Batalli, së bashku me bashkëshorten e tij, Rotariania Rrezarta Nallbani Batalli, dhe Rotarianin Dr. Qerim Shehu, realizuan një vizitë historike në Kajro, Egjipt.

Delegacioni u prit me ngrohtësi nga Guvernatori i Distriktit Rotarian 2451, Sherif Adeeb, dhe ekipi i tij i lartë drejtues.

Në këtë vizitë, u nënshkrua një Memorandum Mirëkuptimi (MoU) midis dy distrikteve, i cili zyrtarizon një partneritet formal dhe krijon mundësi për projekte të përbashkëta dhe shkëmbime kulturore. Guvernatori Adeeb theksoi rëndësinë e kësaj vizite duke e quajtur atë një moment historik dhe një hap të rëndësishëm për të dy distriktet.

“Ky është një moment historik për vendet tona dhe për Distriktet përkatëse Rotariane D2451 dhe D2485. Ne e përqafojmë me gjithë zemër fillimin e këtij bashkëpunimi dhe presim me padurim mundësitë që do të sjellë. Kemi parashikuar një sërë fushash ku mund të fillojmë partneritetin tonë dhe parashikojmë një të ardhme të ndritur për të”, tha Adeeb.

Krijimi i Komitetit Ndërkombëtar të Vendeve (ICC) midis Kosovës, Shqipërisë dhe Egjiptit shënon një kapitull të ri bashkëpunimi dhe miqësie.

Ceremonia e nënshkrimit përfaqëson angazhimin e dy distrikteve për të mbështetur paqen, unitetin dhe shërbimin në nivel global.

“Këto marrëveshje janë më shumë sesa dokumente; ato simbolizojnë vlerat tona të përbashkëta, vizionin tonë dhe angazhimin tonë për të nxitur bashkëpunimin ndërkombëtar. Ato theksojnë trashëgiminë e pasur historike dhe kulturore që na lidh dhe parimet e qëndrueshme të Rotary për paqen, unitetin dhe shërbimin,” shtoi Batalli.

Pas ceremonisë, u zhvillua një diskutim interaktiv me Rotarianët e pranishëm, duke përqendruar vëmendjen në aktivitete të mundshme të përbashkëta. Vizita u mbyll me një angazhim të fortë për të vazhduar këtë rrugëtim të rëndësishëm përmiqësinë dhe shërbimin në komunitet.

Kjo vizitë shënon një hap të rëndësishëm në forcimin e lidhjeve ndërkombëtare të Rotary dhe zgjerimin e pranisë globale të këtij organizimi./Telegrafi/