Në Luginë nis fushata sensibilizuese “E jona më e mira”, qytetarëve iu bëhet thirrje të konsumojnë produkte vendore

Unioni i Afaristëve Vizioni për Preshevë, Medvexhë dhe Bujanoc, ka nisur fushatën sensibilizuese “E jona më e mira”, qëllimi i së cilës është që qytetarët e Luginës t’i konsumojnë vendore.

Në një konferencë për media të premten, kryetari i këtij unioni, Xhelal Memeti, tha se arsyeja pse po iu drejtohen qytetarëve është se në bazë të raportit që e kanë nga terreni, në marketet e këtyre komunave mbi 50 për qind të produkteve që shiten janë të huaja.

“Kurse bojkotohen produktet tona. Por, ne kemi ardhur në përfundim se produktet tona janë më të mira se çdo produkt tjetër. Interesi jonë është që t’i përkrahim qumështoret e tona sepse duke e bërë këtë ne i përkrahim bujqit tanë”, u shpreh Memeti, teksa prezantoi produktet e dy qumështoreve vendore “Fontana” dhe “Doda”.

Ai tutje iu bëri thirrje edhe marketeve që t’i favorizojnë produktet vendore sepse siç tha, në këtë mënyrë i mbështesin edhe bujqit.

“Ky aksion zgjatë deri më 1 mars kur Forumi Rinor i Unionit do ta vizitojë çdo market një nga një dhe do të jemi me kamera live. Ato markete që i bojkotojnë produktet tona, ne bëjmë apel që edhe popullata jonë t’i bojkotojë ato markete”. /Telegrafi/