Në luftën kundër inflacionit, Turqia rriti normat e interesit në 15 për qind

Turqia rriti normën e saj kryesore të interesit nga 8.5 për qind në 15 për qind, duke përmbysur një nga politikat ekonomike të presidentit Recep Tayyip Erdogan.

Rritja prej 6.5 për qind ishte shumë më e ulët nga sa prisnin ekonomistët, por shënoi një ndryshim të madh të politikës nga ekipi i tij i ri ekonomik për të trajtuar inflacionin në rritje.

Udhëheqësi turk deri më tani ka këmbëngulur për uljen e normave të interesit. Inflacioni është pothuajse 40 për qind dhe turqit janë në një krizë të kostos së jetesës për një kohë të gjatë.

Kreu i bankës qendrore të Turqisë, Hafize Gaye Erkan, arriti nga SHBA vetëm këtë muaj pasi lideri turk u rizgjodh president.

Vendimi i saj rriti normat e interesit për herë të parë që nga dhjetori i vitit 2020, pas një periudhe turbulente në të cilën tre guvernatorët e bankave qendrore u pushuan nga puna në më pak se dy vjet, shkruan bbc.

Megjithëse rritja gati dyfishon normën e politikës së Turqisë në 15 për qind, ajo është shumë më pak se sa kishin parashikuar shumë ekonomistë. Banka e investimeve me bazë në SHBA Morgan Stanley parashikoi rritje deri në 20 për qind, ndërsa disa njoftuan rritje deri në 40 për qind.

Në njoftimin e tij, Komiteti i Politikës Monetare të Bankës bëri të ditur se kjo lëvizje është fillimi i një procesi gradual, me synimin për të ulur inflacionin në 5 për qind.

Anëtarët e saj thanë se “vendosën të nisin procesin e shtrëngimit monetar në mënyrë që të vendoset një kurs disinflacioni sa më shpejt të jetë e mundur dhe të kontrollohet përkeqësimi i kontrolleve të çmimeve”.

Problemi i Erdoganit është se norma e inflacionit në Turqi është ende e lartë dhe se rezervat e bankës qendrore të saj kanë rënë në nivele kritike të ulëta, pasi shpenzuan miliarda dollarë në përpjekje për të mbështetur lirën.

Normat e interesit kanë rënë nga 19 për qind dy vjet më parë në 8.5 për qind në muajt e fundit dhe ndryshimi i drejtimit do të ketë pasoja për një vend tashmë në krizë ekonomike. /Telegrafi/