​Në Krushë të Madhe shënohet Dita e gjenocidit serbë kundër shqiptarëve

Në Krushë të Madhe sot është shënuar dita e gjenocidit serbë kundër popullit shqiptar. Derisa në kompleksin memorial të këtij fshati u bënë homazhe u kërkua që kryesit e gjenocidit ndaj qytetarëve të Kosovës të vihen para drejtësisë.

Edhe në këtë ditë u quajt e padrejtë dhe paradoksale që çlirimtarët e Kosovës të jenë në burgjet e Hagës, kurse kriminelët serbe të lëvizin të lirë.

Zëvendëskryeministrja në detyrë e Kosovës, Albulena Balaj tha se sot kur por shënohet dita e Gjenocidit në burgje e Hagës qëndrojnë çlirimtarët të cilët vendit ia dhanë lirinë.

Ajo tha se të gjithë dëshmorët martirët dhe invalidët e luftës do kujtohen përgjithmonë.

“Sot kur po shënohet 15 janari Dita e Gjenocidit, sot gjenden në burgjet e Hagës çlirimtarët tanë kjo është mjaftë e padrejtë, sot kur po shënohet Dita e Gjenocidit kriminelët që e kanë bërë këtë gjenocid janë të lirë dhe po shëtisin lirshëm. Sot kur po shënohet kjo ditë ka ende edhe këtu edhe jashtë që mendojnë që UÇK që mendojnë se ka qenë ndërmarrje kriminale e qe për ne dhe të gjithë do të duhej të ishte ushtria e lavdishme dhe më e mira dhe mbi të gjitha ushtria e cila na çliroi bashkë me ndërkombëtar dhe sot tyre jemi këtu”, tha ajo.

Kurse, kryetari i komunës së Rahovecit, Smajl Latifi u shpreh se nga Krusha e Madhe po kujtojnë të rënët e 10 masakrave në këtë komunë por edhe në gjithë Kosovën, dhe po kërkojnë që përgjegjësit e këtij gjenocidi të vihen para drejtësisë.

Latifi thotë se është padrejtësi e shekullit që themeluesit e Ushtrisë Çlirimtare të Kosovës janë në burgje dhe po synohet edhe dënimi i tyre nga Prokuroria Speciale e Dhomave të Specializuara.

“Janë 10 masakra vetëm në Rahovec që Serbia në mënyrë të organizuar me plan konkret ka bërë krim këtu. Por jo vetëm në komunën tonë por ka bërë krime gjithandej në Kosovë. Ne sot solidarizohemi me familjet e të pagjeturve, heronjve dëshmorëve martirëve dhe ne sot apelojmë tek institucionet tona tek të gjitha strukturat shtetërore të pushtetit gjyqësor, Prokuroria Speciale për Krime të Luftës tek institucionet ndërkombëtare të gjykohet krimi dhe të ndëshkohet krimi dhe kriminelët që mbase lëvizin lirshëm edhe në Kosovës por edhe mos të flasim edhe në Serbi[…]është paradoksale dhe do ta cilësojmë si padrejtësi të shekullit që ne vazhdojmë të ballafaqohemi me padrejtësi kur është ngritur një Gjykatës Speciale për krime lufte për ti hetua e gjykuar mbase edhe mbase sipas synimeve të Prokurorisë Speciale të Dhomave të Specializuara për t’i dënuar ata qe u ngritën në këmbë dhe luftuan për lirin e vendit tonë”, theksoi Latifi.

Përfaqësuesi i Krushës së Madhe, Selami Hoti tha se sot po përkujtojnë të gjithë të rënët në masakrat e komunës së Rahovecit. Hoti kërkoi që të punohet më shumë dhe para drejtësisë të vihen kriminelët që kanë kryer këto krime, por shprehu pakënaqësi për punën e gjyqësorit që po bënë karshi dënimeve të kriminelëve që kanë kryer krime në Kosovë.

Derisa kërkoi që t’i bëhet më shumë presioni shtetit serbe që të tregoj për fatin e të pagjeturve ai tha se në Krushë të Madhe janë edhe 64 të pagjetur.

“Kërkojmë nga të gjitha instancat politike jo vetëm të Kosovës por mbarë kombit shqiptar të bëhen bashkë dhe të punojnë e t’i lënë anash inatet politike me një qëllim të mirë që njëherë e përgjithmonë jo vetëm që të mbyllet kjo plagë e rëndë e të pagjeturve sikurse është rasti i Ukshin Hotit e Fahri Hotit por të punohet dhe gjithë kjo çështjen para gjyqit dhe para drejtësisë t’i vendosë kriminelët të cilët vazhdojnë të jetojnë të lirë. Deri tani kemi pasur një adresë se UNMIK-u apo EULEX-i nuk ka bërë punën e drejtë por tani kemi telashe edhe me administratën tonë shtetërore me gjykatat tona të cilat edhe kësaj radhe në vend qe ta dënojnë agresorin merren me viktimën”, tha ai.

Sot kur po shënohet 15 janari Dita e gjenocidit serbë në Kosovë homazhe po bëhen edhe në Reçak, ku po përkujtohen masakra e cila bëri jehonë dhe ngriti vetëdijen ndërkombëtare për të intervenuar në Kosovë.