Me 07 Nëntor 2018, në një ceremoni të organizuar nën patronatin e Kolegjit ILIRIA, Agim Agushi, tashmë rekordmen i shumëfishtë botëror, i cili disa herë ka arritur ta shkruaj emrin e tij në librin e Guiness- it, përsëri arriti një rekord të ri botëror.
Agim Agushi, i cili është i angazhuar edhe në Kolegjin ILIRA, është i pari në botë që arriti rekord gjatë ndërrimit të 70 fanelave.
Sipas komisionit të përbërë nga z.Gani Kosumi, redaktor i sportit në RTK, z. Arbër Reçi, Sekretar i Përgjithshëm pranë Kolegjit ILIRIA dhe Petrit Hasanaj, profesor në Kolegjin ILIRIA, u konstatua që Agim Agushi për 28 minuta e 34 sekonda, shënoi rekordin botëror, në kategorinë e veshje – zhveshje të 70 fanelave, gjatë goditjeve të topit më kokë.
“Ndihem shumë i privilegjuar dhe kam kënaqësinë, që në një ceremoni të organizuar nga Kolegji ILIRIA, të arrijë një rekord botëror, i cili iu paraprinë edhe disa rekordeve të tjera botërore, të cilat shumë shpejt po synoj t’i arrijë”, tha Agim Agushi, pasi pranoi edhe një certifikatë mirënjohjeje, nga Kolegji ILIRIA.
“Është një rekord i cili është kërkuar nga klubi i rekordeve të botës. Ky është vetëm një nga rekordet e mia, të cilat do të vazhdojnë menjëherë muajin tjetër. Nëse më aprovohet nga institucionet në Dubai, atje do të tentojë të shënojë rekord botëror në librin Guiness në kategorinë ngritje - zbritje shkallëve, duke goditur topin me kokë”, rekord të cilin synoj ta arrijë në “Burj Kalifa” apo “Kulla Dubai” që është edhe ndërtesa më e lartë në botë me 211 kate", u shpreh rekordmeni kosovar.
“Kolegji ILIRIA, përveç angazhimeve në procesin mësimor e shkencor, organizon dhe përkrahë edhe aktivitete kulturore, sportive. Kolegji ILIRIA është i nderuar, që ka organizuar një garë të tillë botërore, ku u arrit një rekord botëror”, tha Isak Shema, rektor në Kolegjin ILIRIA.
Për zhonglerin Agim Agushi ky është suksesi i rradhës, pasi edhe në të kaluarën ka thyer rekorde në disiplina dhe vende të ndryshme.
