Më në fund prezantohet telefoni Nothing Phone (1), do të kushtojë 469 euro

Brendi Nothing edhe zyrtarisht ka prezantuar telefonin e parë të mençur, e ai është Nothing Phone (1).

Pas një sërë “tejzerësh” që kemi pasur rastin t’i shohim javëve të fundit si dhe rrjedhjen e informacioneve për specifikat, të gjitha detajet e Nothing Phone (1) më në fund janë zbuluar, transmeton Telegrafi.

Telefoni vjen me një kornizë të aluminit të ricikluar, ka ekran 6.55 inç OLED me rezolucion 1.080 x 2.400 pikselë, frekuencë freskimi prej 120 Hz.

Paneli është i mbrojtur me xhamin Gorilla Glass 5, katër linja simetrike dhe këtë pajisje e vë në punë procesori Qualcomm Snapdragon 778G+.

Në pjesën e pasme gjendet kamera prej 50 Mp (Sony IMX766) me lente stabilizuese. Aty është edhe kamera selfie prej 16 MP (Sony IMX471).

Sensorëri i gjurmëve të gishtërinjve është i integruar në ekran, kurse telefoni përdor sistemin operativ Nothing OS (1) i bazuar në Android 12. Nga Nothing kanë bërë të ditur se softueri do të jetë i besueshëm dhe shumë i lehtë për të punuar.

Telefoni ka një bateri me kapacitet prej 4.500 mAh dhe mbushësin prej 33 W. Në rastin e mbushësit, telefoni mund të mbushet plotësisht për vetëm 70 minuta kariikim.

Nothing Phone (1) me 8 GB Ram dhe 128 GB memorie të brendshme do të kushtojë 469 euro, derisa versioni me 256 GB memorie të brendshme do të jetë 499 euro. Në ofertë do të jetë edhe versioni me 8 GB dhe 256 GB memorie të brendshme me një çmim prej 549 euro.

Shitja do të fillojë më 16 korrik në Britani të Madhe, e pas 21 korriku do të jetë i qasshëm në Danimarkë, Finlandë, Francë, Gjermani, Hong Kong, Hungari, Indi, Izrael, Malajzi, Itali, Holandë, Norvegji, Filipine, Poloni, Portugali, Rumani, Arabinë Sauditë, Spanjë, Singapor, Suedi, Zvicër, Tajvan, Tajlandë, Emiratet e Bashkuara Arabe dhe Makau. /Telegrafi/