Ndizet derbi i Mançesterit para kohe: Haaland thumbon keq Unitedin

Erling Haaland ka firmosur për pesë vite me Manchester City, kontratë nga e cila do të përfitojë 30 milionë euro në sezon.

Kampionët e Anglisë shpenzuan 60 milionë euro për kartonin e sulmuesit norvegjez.

21-vjeçari ka dhënë sot një prononcim përpara tifozëve të mbledhur në “Etihad Stadium”, aty ku nuk mungoi thumbimi ndaj “armiqve” të Manchester United.

“Është fantastike të jesh këtu, do të argëtohemi së bashku. Pritshmëritë e mia për këtë sezon janë që të përfshihem në mënyrën më të mirë të mundshme në ekip dhe të lidhem menjëherë me shokët e mi”, deklaroi fillimisht Haaland.

“Pastaj sigurisht që dua të argëtohem, sepse kur zbavitem shënoj gola dhe fitoj ndeshje. Manchester City është një ekip fantastik, edhe më i veçantë për mua, sepse babai im luajti këtu për disa vjet”.

“Është diçka e bukur kur një fëmijë ndjek hapat e babait të tij. Kundër cilit ekip mezi pres të luaj? Besoj se nuk ka nevojë ta them… Manchester United”, deklaroi më tej bomberi viking. /Telegrafi/