Dy aeroplanë luftarakë polakë interceptuan një aeroplan spiun rus që fluturonte pa një transponder aktiv mbi Detin Baltik të martën, tha ushtria polake të mërkurën.
Aeroplani rus Il-20 nuk kishte paraqitur një plan fluturimi për "misionin e tij të zbulimit" në hapësirën ajrore ndërkombëtare, tha komanda operative e Varshavës në një deklaratë.
Aeroplani nuk shkeli hapësirën ajrore të Polonisë. Dy aeroplanë luftarakë polakë MiG-29 shoqëruan aeroplanin rus nga zona, transmeton Telegrafi.
"Falë gatishmërisë së lartë luftarake, profesionalizmit të pilotëve dhe funksionimit efikas të sistemit të mbrojtjes ajrore, operacioni u krye shpejt, në mënyrë efektive dhe të sigurt", tha ushtria polake në një deklaratë.
Deti Baltik nganjëherë quhet "liqeni i NATO-s", i kufizuar nga anëtarët e aleancës.
Por Rusia ka një prani të konsiderueshme ushtarake në enklavën e saj të Kaliningradit në bregdetin Baltik, të vendosur midis Polonisë dhe Lituanisë. /Telegrafi/
