Mushkolaj: Todosijeviq duhet të ndiqet penalisht, e jo të shpërblehet

Ivan Todosijeviq, i emëruar nga kryeministri Isa Mustafa në postin e ministrit të Administrimit të Pushtetit Lokal, është kuadër i partisë së Aleksandër Vuçiqit, ndërkohë që aktualisht kryen edhe funksionin e kryetarit të Organit të përkohshëm të Komunës së Zveçanit.

Por zëvendësministri i Administrimit të Pushtetit Lokal, Bajram Gecaj ka thënë në një prononcim për Telegrafin se, ministri i emëruar nga Kryeministri ka dhënë dorëheqje nga të gjitha funksionet e më hershme.

Sipas tij, ky është një rast i mirë i integrimit të minoriteteve serbe në institucione.

“Ka pritur që të emërohet, kështu që dje ka dhënë dorëheqje nga të gjitha funksionet tjera. Ky është edhe një rast më shumë i integrimit”, ka thënë Gecaj për Telegrafin.

Ndërsa analisti Imer Mushkolaj, e cilëson emërimin e Todosijeviqit rast i cili do duhej të duhej të ndiqej penalisht, e jo të shpërblehej me post ministri në Qeverinë e Kosovës.

Ai gjithashtu ka thënë se Todosijeviq ka ushtruar funksionin e kryetarit të një strukture paralele, duke kryer kështu vepër penale kundër rendit kushtetues të Kosovës.

“Beogradi bashkëqeverisjes në Kosovë nëpërmjet Listës Serbe imponon edhe emra të tillë. Fatkeqësisht, kryeministri Mustafa i pranon ata, duke futur në qeveri struktura paralele që kanë për synim sabotimin e shtetësisë së Kosovës”, u shpreh Mushkolaj për Telegrafin.

Ndryshe, Ivan Todosijeviq më parë ka qenë drejtor i një Ndërmarrjeje Publike të Zveçanit. Në zgjedhjet lokale të organizuara nga Qeveria e Kosovës, Todosijeviq ka qenë kandidat për kryetar komune, por që ishte tërhequr nga gara. /Telegrafi/