Murtezani: Maqedonia e Veriut mbetet e përkushtuar në të ardhmen e vet evropiane

Ministri i Çështjeve Evropiane, Orhan Murtezani, realizoi takim me ministrin polak për Çështje Evropiane, Adam Shlapka, në kuadër të vizitës së tij të punës në Varshavë të Polonisë.

Takimi, siç informoi Ministria e Çështjeve Evropiane, u mbajt në frymën e shënimit të fillimit të kryesimit polak me Këshillin e Bashkimit Evropian.

“Në takim u diskutuan prioritetet e kryesimit polak, me theks të veçantë përforcimi i perspektivës evropiane të vendeve të Ballkanit Perëndimor, përfshirë edhe Maqedoninë e Veriut. Ministri Murtezani theksoi arritjet e deritanishme të Maqedonisë së Veriut në negociatat aderuese me BE-në dhe theksoi rëndësinë e mbështetjes nga vendet anëtare për avancimin e mëtejshëm të procesit integrues”, qëndron në kumtesë.

Ministri Shlapka konfirmoi përkushtimin e Polonisë për mbështetje aktive të aspiratave evropiane të Maqedonisë së Veriut, duke theksuar se zgjerimi i Bashkimit Evropian mbetet një nga prioritetet kryesore të kryesimit polak.

Dy ministrat u dakorduan se përforcimi i bashkëpunimit rajonal, stabiliteti ekonomik dhe zbatimi i reformave janë të rëndësisë thelbësore për krijimin e rajonit të qëndrueshëm dhe prosperues.

Ministri Murtezani shprehu mirënjohje për mbështetjen e vazhdueshme të Polonisë dhe potencoi se dialogu aktiv me vendet anëtare të BE-së është kyçe për zbatimin e suksesshëm të procesit aderues.

“Maqedonia e Veriut mbetet e përkushtuar për të ardhmen e saj evropiane ndërkaq kryesimi polak është mundësi shtesë për përforcimin e qëllimeve të përbashkëta për Ballkan të qëndrueshëm, të integruar dhe prosperues”, qëndron në kumtesën e Ministrisë së Çështjeve Evropiane.