Muharremaj: Mustafa e Thaçi do të shndërrohen në Ahmet Zog

Nëse demarkacioni i kufirit me Malin e Zi do të kalojë në Kuvendin e Kosovës atëherë, sipas deputetit të AAK-së Bali Muharremaj, Isa Mustafa e Hashim Thaçi do të shndërrohen në Ahmet Zog, duke u referuar në dhënien e Shën Naumit nga Zogu.

Muharremaj, në “Interaktiv” të KTV-së ka thënë se toka që po humbet nga demarkacioni me Malin e Zi është e krejt Kosovës, transmeton Koha.net.

“Ajo është tokë e Kosovës, jo e Dukagjinit. Për atë tokë ka luftuar dikush. Nuk do të kalojë në Parlamentin e Kosovës. Ky është akti më i rëndësishëm pasluftës dhe nuk dua që pas 10 vjetëve dikush t’ua bëj me gisht fëmijëve të mi. Isa Mustafa e Hashim Thaçi do shndërrohen në Ahmet Zog nëse kalon demarkacioni”, ka thënë Muharremaj.

Deputeti i AAK-së ka thënë se marrëveshja është dashur që të konsultohej në Kuvend para se të nënshkruhej, sepse Kuvendi duhej të merrte këso vendimesh.

Diskutimet për kufirin, sipas Muharremajt kanë filluar qysh në vitin 2007, kur ai si pjesë e Ministrisë së Brendshme të asaj kohe ka marrë pjesë në diskutime bashkë me Atifete Jahjagën, atëherë drejtoreshë e Policisë Kufitare.

Ndërsa për një takim që është mbajtur sot mes të gjitha partive, ku AAK-në e ka përfaqësuar Ardian Gjini, Muharremaj ka thënë se ka qenë vazhdimësi e takimeve të mëhershme dhe nuk ka pasur rezultate, duke përsëritur se zgjidhja e vetme është kthimi i demarkacionit.

Muharremaj ka thënë që çështja e hedhjes së gazit nga AAK-ja ka marrë fund.

“Aleanca nuk do të përdorë gaz lotsjellës dhe deri sa kemi mundsi të rrimë brenda, rrimë, kur nuk mundemi atëherë dalim”, ka thënë Muharremaj, duke shtuar se në Kuvend të Kosovës kthehen kur të vije në votim demarkacioni për ta ndaluar votimin me fjalime dhe me forma demokratike.