Kur bëhet fjalë për makinën larëse të enëve, ka shumë pyetje rreth mënyrës së duhur të renditjes së enëve
Për të zgjidhur dilemat lidhur me përdorimin korrekt të makinës larëse, menaxheri i departamentit të inxhinierisë së cilësisë në një kompani, Marti Olsen, ka zbuluar një gjë të rëndësishme që duhet ta dini para se ta ndizni këtë pajisje.
Në fakt, nuk duhet të vendosni kurrë enë plastike në raftin e poshtëm të makinës.
Nëse ndonjëherë, si fëmijë, keni provuar të ngrohni një lodër plastike në mikrovalë, tashmë e dini çfarë ndodh kur plastika bie në kontakt me nxehtësinë.
Shumica e makinave larëse të enëve kanë një element ngrohës të ekspozuar në fund, i cili shërben për të ngrohur ujin dhe për të tharë enët.
Nëse plastika bie aty, mund të shkrihet ose të deformohet. Kjo vlen sidomos për enët apo çdo plastikë që përdoret për paketimin e ushqimit, transmeton Telegrafi.
“Nxehtësia ushtron presion më të madh mbi plastikën në raftin e poshtëm kur elementi ngrohës i ekspozuar është burimi kryesor i nxehtësisë për tharjen. Nëse objektet plastike bien në kontakt me elementin gjatë ciklit të tharjes, ka shumë gjasë që të dëmtohen. Kjo ndodh kur konsumatorët vendosin enët në raftin e poshtëm, në vend të atij të sipërm”, ka sqaruar ai.
Vendi më i sigurt për enët plastike është rafti i sipërm, më larg elementit ngrohës. Në këtë drejtim, eksperti Olsen ka ndarë disa këshilla për të siguruar që enët plastike të dalin të pastra dhe të padëmtuara:
▪ Vendosja në pjerrësi: Vendosni enët në një kënd që uji të kullojë më lehtë dhe të parandaloni grumbullimin e tij.
▪ Siguroni enët e vogla: Përdorni kapëse ose mbajtëse për të fiksuar enët e vogla ose të lehta që mund të përmbysen gjatë larjes.
▪ Shmangni mbingarkimin: Kujdesuni që të ketë mjaftueshëm hapësirë rreth çdo ene, për një qarkullim të plotë të ujit, duke përmirësuar pastrimin dhe duke reduktuar mbetjet.
Edhe pse mund të duket e qartë, gjithmonë kontrolloni nëse enët plastike (apo çdo objekt tjetër) janë të përshtatshme për larje në makinë, para se t’i vendosni aty.
Jo çdo plastikë është e njëjtë, prandaj kërkoni shenjën që tregon se janë të sigurta për larje në makinë, në mënyrë që të mos i dëmtoni enët ose vetë makinën larëse të enëve. /Telegrafi/
