“Mos bëj ndonjë budallallëk”, Rooney paralajamëron yllin e Anglisë para ndeshjes me Sllovakinë

Anglia do të përballet me Sllovakinë për një vend në çerekfinale të Euro 2024, por Wayne Rooney ka paralajmëruar yllin e “Tre Luanëve”, Jude Bellingham që të mos lejojë nervozizmin e tij të “vlojë” në këtë përballje.

Anglia e përfundoi si lider Grupin C me dy barazime dhe një fitore për të siguruar kështu një vend në mesin e 16 kombëtareve më të mira dhe tani do të takohen me Sllovakinë e cila përfundoi e treta në Grupin E.

Të besuarit e Gareth Southgae nuk kanë bindur me paraqitjet e tyre në Kampionatin Evropian deri më tani, duke marrë shumë kritika nga tifozët dhe gazetarët për taktikat, lojtarët që u përdorën dhe stilin e lojës.

Për shkak se përfunduan si lider të grupit, ekipi i Anglisë pati një short të favorshëm duke evituar kundërshtarët si Gjermania, Franca, Portugalia dhe Spanja.

Lexo po ashtu Rooney ‘fajëson’ Guardiolën për paraqitjen e dobët të Anglisë në Euro 2024

Fituesi i kësaj përballje do të luante në çerekfinale me Zvicrën që sot (29 qershor) arriti ta eliminojë Italinë duke e mposhtur me rezultat 2-0.

Para fillimit të kësaj ndeshje, Rooney ka paralajmëruar yllin e Real Madridit, Jude Bellingham, që të mbajë qetësinë pasi në disa raste dëshmoi momente nervozizmi në barazim ndaj Sllovenisë.

Ish-reprezentuesi anglez i ka kërkuar Bellinghamit që të mos lejojë nervozizmin të vlojë dhe të mos lejojë veten që të bëjë ndonjë budallallëk.

“Tre ose katër herë në pjesën e parë ndaj Sllovenisë ai nuk mund ta fshehte nervozizmin e tij. Ai po shikonte përreth tek të tjerët duke i çuar krahët lart. Gjuha e trupit e çon një mesazh tek tifozët, bashkëlojtarët e tij dhe trajneri”, ka thënë Rooney.

“Unë kam qenë aty. E di saktësisht pozicionin në të cilin ndodhet ai. E kam gjetur veten shpeshherë në atë situatë gjatë kohës sa luaja me kombëtaren dhe në disa momente me ekipin. Unë vetëm shpresojë që nervozizmi të mos vlojë deri në atë pikë që ai të ndëshkohet me të kuq ose të bëjë ndonjë budallallëk dhe të lëndohet”, përfundoi ai./Telegrafi/