Ministria e Shëndetësisë në Maqedoni me fushatë për t’i vaksinuar të gjithë fëmijët

Ministria e Shëndetësisë ka nisur aktivitetet në terren në kuadër të një fushate të gjerë për promovimin e imunizimit, e cila po zbatohet së bashku me Organizatën Botërore të Shëndetësisë dhe me mbështetjen financiare të Bashkimit Evropian.

Fushata do të përfshijë 20 komuna (120 vendbanime, rurale dhe urbane), ku është regjistruar një mbulim më i ulët i fëmijëve të vaksinuar sipas kalendarit për imunizimin e detyrueshëm, si dhe vaksinimin kundër Covid-19. Mbi 30 ekipe të personelit mjekësor nga qendrat shëndetësore në vend shkojnë “derë më derë”, pra vizitojnë familjet ku ka persona të pavaksinuar.

Ekipet informojnë familjet për përfitimet e imunizimit, ndajnë materiale promovuese dhe, në marrëveshje me prindërit, kanë mundësinë të caktojnë takimet e vaksinimit nga kalendari i rregullt i imunizimit. Fushata do të zgjasë pesë javë (deri në fund të majit) dhe janë planifikuar të vizitohen mbi 2900 familje. Si pjesë e fushatës, të moshuarit mbi 60 vjeç kanë mundësinë të marrin një vaksinë polivalente kundër Covid-19 si një dozë përforcuese në vend.

Në këtë drejtim, pikërisht në Javën e imunizimit, e cila zgjat nga 23 deri më 29 prill, Qendra Shëndetësore Shkup ka marrë pjesë aktive me ekipet e saj që dalin në terren në disa komuna të Shkupit.

“Shtëpia e Shëndetit Shkupi është përfshirë në Javën e Imunizimit, në territorin e tri komunave, përkatësisht në Gjorçe Petrov, Çair dhe Gazi Babë dhe vendbanimet përreth tyre. Ekipet promovuese dalin në terren për të informuar prindërit për rëndësinë e imunizimit të fëmijëve të tyre, veçanërisht për ata fëmijë që nuk janë vaksinuar ose kanë humbur një vaksinë. I gjithë aksioni është për të rritur mbulimin e fëmijëve të imunizuar rregullisht, prandaj ekipet tona ofrojnë informacion të detajuar dhe këshillojnë për përfitimet e imunizimit të rregullt. Domethënë i informojnë prindërit dhe caktojnë takim në pikat më të afërta të vaksinimit”.

“Sipas raportit të fundit të UNICEF-it, Maqedonia renditet e dyta në botë për nga numri i fëmijëve që nuk janë vaksinuar që nga lindja. Është një fakt shqetësues. Prandaj më vonë do të përballemi me shfaqjen e sëmundjeve që konsiderohen të zhdukura. Ne jemi ende duke luftuar me rritjen e ndërgjegjësimit për imunizimin kundër fruthit. Disa vite më parë patëm një epidemi të kësaj sëmundjeje të rrezikshme virale. Duhet kuptuar se imunizimi është vendimtar për parandalimin e sëmundjeve që mund të jenë vdekjeprurëse. Ekipi ynë mobil sot është në Shuto Orizarë nga ora 9 deri në 13”, thotë drejtori i Shtëpisë së Shëndetit në Shkup, d-r. Viktor Isjanovski./Koha.mk/