Ministria e Shëndetësisë apel qytetarëve: Kujdes, rezultatet e sotme të COVID-19 janë inkurajuese

Ministria e Shëndetësisë e sheh si një rezultat premtues numrin më të vogël të rasteve që kanë rezultuar sot pozitive (6 raste pozitive nga 294 mostra të analizuara) për SARS-COV-2 nga ana e Institutit Kombëtar të Shëndetësisë Publike të Kosovës.

Po ashtu, MSH e sheh këtë rezultat si një tregues se situata rreth pandemisë COVID-19 është nën kontroll në Kosovë, pavarësisht lehtësimit të masave.

“MSh u bën thirrje qytetarëve të Kosovës që të vazhdojmë me disiplinë të lartë në zbatimin e masave të ndërmarra nga Qeveria e vendit dhe rekomandimeve të IKSHPK, me qëllim që të parandalohet përhapja e virusit. Gjithashtu, MSh u bën thirrje qytetarëve që të jenë të kujdesshëm në zbatimin e masave mbrojtëse si bartja e maskave, ruajtja e distancës sociale e fizike dhe mirëmbajtjen e higjienës individuale e kolektive”, thuhet në komunikatën për medie të MSH-së.

Ministria e Shëndetësisë po ashtu, ka rikujtuar se kujdesi në ushtrimin e veprimtarive të hapura duke iu përmbajtur rekomandimeve të IKSHPK-së është jetik në parandalimin e shtimit të rasteve me Covid-19 që do të ishte një barrë e madhe në këtë kohë edhe për personelin dhe infrastrukturën shëndetësore si dhe kthim prapa në progresin e shënuar.

“U bëjmë thirrje qytetarëve që të mos shpërfillin masat e marra dhe të vazhdojmë së bashku me kujdes të shtuar dhe vet disiplinë për të ruajtur shëndetin e njëri-tjetrit, shëndetin e qytetarëve tanë”, thuhet tutje në komunikatë.

Instituti Kombëtar i Shëndetësisë Publike të Kosovës (IKSHPK) ka njoftuar se pas testeve të kryera, sot janë raportuar gjashtë raste të personave të infektuar me coronavirus.

Sipas ISHPK, nga komuna e Prishtinës janë 3 raste dhe nga një rast në Mamushë, Vushtrri dhe Gjilan./Telegrafi/