Minatorët e Stantërgut rikthehen në grevë me katër kërkesa (Video)

Minatorët e Stantërgut i janë rikthyer grevës, duke ri kërkuar rritjen e pagës për 20 për qind, dhe disa kërkesa të tjera. Kryetari i Sindikatës së Minatorëve, Shyqyri Sadiku, tha për RTV Dukagjini se minatorët janë të vendosur të qëndrojnë në grevë deri në përmbushjen e kërkesave nga qeveria.

Nga e enjtja minatorët e Stantërgut, kanë hyrë në grevë të paparalajmëruar, duke ri kërkuar rritjen e pagës prej 20 për qind, dhe një varg kërkesash tjera.

Ditën e hënë greva u pezullua për shkak të festës, për të vazhduar të martën , tha kryetari i Sindikatës së Minatorëve, Shyqyri Sadiku.

“Kërkesat kanë qenë që të rriten pagat prej 20%. Kërkesa e dytë ka qenë që të mos bëhen punësime në Trepçë pa konkurse. Kërkesa e tretë ka qenë që bordi i Trepçës të vjen para minatorëve grevistë dhe të jap një raport pune për tetë muajt e fundit dhe të përballen me kërkesat e minatorëve. Kërkesa e katërt ka qenë që kërkesat e minatorëve nga greva e pezulluar e korrikut të plotësohen, pasi fatkeqësisht deri tani nuk janë plotësuar”, deklaroi Shyqyri Sadiku, përcjell Telegrafi.

Ai tha se minatorët iu kthyen grevës si pasojë e mos përmbushjes së premtimeve, nga kryeministri i vendit.

“Një marrëveshje është arritur me Kryeministrin me 13.07.2018, dhe në atë marrëveshje shkruhet se brenda tre muajve duhet të realizohen kërkesat e minatorëve. Deri më tash fatkeqësisht kërkesat nuk janë realizuar”, tha më tej Shyqyri Sadiku.

Sadiku shtoi se tashmë protesta ka kaluar në duart e këshillit të grevisteve të minatorëve, të cilët sipas tij paralajmërojnë grevë pa afat kohor, deri në përmbushjen e kërkesave./RTV Dukagjini/Telegrafi/