Mediat e huaja shkruajnë rreth “bumit të kirurgjisë kozmetike në Shqipëri” – dhe si operatorët mashtrues po vënë disa pacientë në rrezik

Stresi pandemik dhe përqendrimi në fytyrat e tyre gjatë bisedave me video po nxisin një bum të kirurgjisë kozmetike në Shqipëri – por operatorët mashtrues po vënë disa pacientë në rrezik.

Mjekët thonë se “mbingarkesa” është nxitur nga kërkesa e grave kryesisht të reja si Ana Kela, një studente 20-vjeçare në Tiranë, të cilës i janë “rregulluar” buzët në dhjetor.

“Sa herë që shikoja fytyrën në ekran, nuk mund të thosha as një fjalë, më kapte ankthi”, ka thënë Kela duke parë veten gjatë orëve në internet në Universitetin e Tiranës, ku studion për ekonomi.

“Mendova se dukesha e shëmtuar, hunda ishte shumë e madhe, buzët e mia ishin shumë të holla, një fatkeqësi e vërtetë”.

Dhe pas një operacioni për të rritur vëllimin e buzëve të saj, ajo është e kënaqur me rezultatin, shkruajnë mediat e huaja, përcjell Telegrafi.

Por në një vend ku ekonomia joformale është e shtrirë, shumë pacientë po joshen nga qendra joprofesionale dhe të pajisura keq, të cilët po reklamojnë çmime dhe promocione të lira.

Operatorë të pakualifikuar

Sipas një shkrimi të publikuar nga AFP dhe të shpërndarë edhe nga media të tjera botërore, sallone të reja po shfaqen çdo ditë me oferta për një sërë trajtimesh pa aprovim ose mbikëqyrje mjekësore – ka thënë Dr. Monika Fida, një profesoreshë në Universitetin e Mjekësisë në Tiranë.

Të reklamuara në mediat sociale, ofertat me kosto të ulët janë tërheqëse në një vend ku pagat mesatare mujore lëvizin rreth 420 euro.

“Ejani si një grup prej katër vetash për të shijuar një zbritje prej më shumë se 50 për qind” në heqjen e buzëve dhe ngritjen e vitheve, shkruan në një reklamë.

“Jeta nuk është perfekte, por vetullat tuaja janë”, thotë një tjetër.

Këto sallone “përdorin pajisje që duhet të trajtohen vetëm nga specialistë dhe mjekë të licencuar”, mendon Dr. Brunilda Bardhi, e cila është e specializuar në trajtimet me laser dhe mezoterapi që forcojnë lëkurën.

Sipas sondazheve në terren të kryera nga një shoqatë e mjekëve dermatologjikë dhe kozmetikë që Bardhi drejton, rreth 70 sallone në Tiranë kanë pajisje laser të operuara nga personel të pakualifikuar.

Djegie dhe shenja

Eva Kola, një studente 21-vjeçare e shkencave politike, i besoi një salloni, punën e të cilit po e ndiqte nga afër në Instagram.

Për 20 euro, ajo pagoi që inicialet e ish-it të saj të fshiheshin nga tatuazhi i gishtit, përcjell Telegrafi.

Por rregullimi i shpejtë nuk shkoi siç ishte planifikuar.

“Për një javë tani, jeta ime ka qenë ferr”, i tha ajo AFP, përcjell Telegrafi, duke mbajtur lotët, në dhomën e pritjes së departamentit të dermatologjisë të Spitalit Universitar të Tiranës.

Laseri i kalibruar keq shkaktoi një djegie të shkallës së tretë dhe një reaksion të fortë alergjik dhe madje ajo ka ethe dhe dhimbje të padurueshme përgjatë krahut.

“Vetëm në klinikën time, unë kam pesë deri në shtatë raste, kryesisht vajza të reja, me probleme serioze, djegie, infeksione, shenja si rezultat i procedurave të kryera” në qendrat e bukurisë pa staf mjekësor profesional, thotë Dr. Fida, duke treguar imazhe të pacientëve, puna e të cilëve shkoi keq.

Ndërsa Dr. Kostandin Balloma, drejtori i Qendrës Mjekësore Luis në Tiranë, vlerëson se 30 për qind e klientëve të tij janë viktima të “gabimeve të bëra nga institucione jo të specializuara”.

Sektori i kozmetikës në Shqipëri supozohet të rregullohet nga një ligj i vitit 2017, por mjekët thonë se është shumë e paqartë, duke mos pasur specifikë se kush mund të kryejë cilat trajtime dhe me cilat produkte dhe pajisje.

Duhet të ketë “një kornizë rregullatore të rreptë ku të gjitha procedurat profesionale dhe të gjitha lidhjet në këtë zinxhir janë të detajuara qartë”, i tha AFP-së, presidenti i Rregullatorit të Mjekëve të Shqipërisë, Dr. Fatmir Brahimaj.

Intervenimet rreth hundës u dyfishuan

Mjekët thonë se trajtimet “më të shitura” gjatë pandemisë janë përqendruar në fytyrë – injeksione me botoks, si dhe forma të tjera të riformimit – megjithëse operacionet e gjirit dhe vitheve vazhdojnë të jenë të popullarizuara.

Me mbipeshën që shihet si një faktor, rreziku për ata që kontraktojnë Covid-19, liposuksioni është gjithashtu i kërkuar në mesin e atyre që shpresojnë se mund të ndihmojë.

“Trendi është i qartë. Operacionet e hundës janë pothuajse dyfishuar” që nga fundi i masave të bllokimit në korrik, ka treguar Dr. Balloma.

“Kirurgjia kozmetike shihet si një komoditet, një mënyrë për të lehtësuar pasigurinë e jetës sonë të përditshme dhe për t’u strehuar në një botë që zbut fytyrën”, shtoi ai.

Jorida Zegali, psikologe klinike në Universitetin e Tiranës, thotë se “presioni i komunikimit virtual” ka rritur përqendrimin në paraqitje, duke u bërë madje një “fiksim”.

Ka pasur gjithashtu presion për t’u rishfaqur nga periudha të gjata të izolimit.

Nertila Rrahmani, 31 vjeçe, është një manikyriste në Milano por u kthye në Tiranë për t’iu nënshtruar një operacioni në hundë sepse po përjetonte probleme me frymëmarrjen, përcjell Telegrafi.

Ajo gjithashtu shfrytëzoi rastin për të “rregulluar” formën e saj dhe për të “vendosur” përsëri veshët në mënyrë që ato të duken më të vegjël.

Ende e veshur me fasha pas operacionit, ajo shpjegoi se operacioni “do të më lejojë të heq qafe shqetësimin psikologjik me të cilin jam prej vitesh”.

“Pavarësisht nga gjithçka”, shtoi ajo, “pandemia nuk ka qenë në gjendje të parandalojë njerëzit që ta përmirësojnë pamjen e tyre përmes trajtimeve estetike për t’i bërë ata të ndihen edhe më të bukur”. /Telegrafi/