Mbappe në bisedime të avancuara për ta blerë klubin tek i cili ishte afër transferimit në 2013

Kylian Mbappe dhe familja e tij janë në bisedime të avancuara për blerjen e një klubi në të cilin ai ishte shumë pranë transferimit në vitin 2013, sipas raportimeve në Francë.

25-vjeçari do të prezantohet si lojtar i Real Madridit të martën e 16 korrikur pasi ëndrra e tij për t’u transferuar tek ‘Los Blancos’ u konfirmua muajin e kaluar.

Për të festuar transferimin e tij, një prezantim madhështor do të mbahet në ‘Santiago Bernabeu’, aty ku mbi 80 mijë tifozë do të jenë pjesëmarrës në shkallët e stadiumit.

Përtej fushës, duket se Mbappe dhe familja e tij po punojnë në një marrëveshje për të investuar ne klubin e ligës së dytë të futbollit francez, Stade Malherbe Caen.

Caen momentalisht po kërkon investitorë të rinj pasi firma amerikane Oaktree Capital Management e ka informuar aksionarin që ka pakicën e aksioneve të klubit se do të tërhiqen nga pronësia e klubit.

Biznesi i familjes së Mbappes, që në pjesën më të madhe të saj përfshinë nënën e tij, Fayza Lamari, është i interesuar për të blerë shumicën e aksioneve të Caenit.

Në fakt, bisedimet janë në një fazë të avancuar gjithnjë sipas raportimeve nga gazeta franceze Ouest-France.

Mbappe ishte në prag të kalimit tek Caeni në vitin 2013, por transferimi dështoi pasi klubi kishte rënë nga elita e futbollit francez dhe më pas ai iu bashkua Monacos./Telegrafi/