Masar Omeragiç: VAR-i në Maqedoni nga sezoni i ardhshëm

Masar Omeragiç pasi që është zgjedhur president i ri i Federatës së Futbollit të Maqedonisë, në fjalimin e tij të parë para publikut ka paralajmëruar futjen e sistemit VAR në Maqedoni që në sezonin e ardhshëm, njofton Telegrafi.

Omeragic gjithashtu ka konfirmuar se Bllagoja Milevski do të mbetet në pozitën e përzgjedhësit të seniorëve.

“Duke nisur nga sezoni i ardhshëm, VAR-i do të zbatohet edhe në vendin tonë, pra duke filluar nga gushti i vitit të ardhshëm. Do të na duhen katër deri në pesë muaj për të trajnuar gjyqtarët dhe për të instaluar të gjitha pajisjet e nevojshme, përfshirë kamerat”, tha Omeragic.

Ai paralajmëroi edhe reforma në ekipet e përzgjedhjeve të reja si dhe përpjekje për të ruajtur vazhdimësinë e rezultateve të mira në përzgjedhjen e seniorëve.

“Jemi të vetëdijshëm se duhet të punojmë më shumë për të arritur rezultate. Suksesi historik, kualifikimi në Evropian si dhe fitorja ndaj Italisë duhet shpërblyer dhe të tregojmë vazhdimësi. Për momentin më e rëndësishmja është që lojtarët më të mirë të luajnë për Maqedoninë. Planifikojmë reformë që do të duhet të japë rezultate brenda dy viteve. Kualifikuesit për KB fillojnë në mars dhe e njëjta gjë vlen për të gjithë – rezultatet janë më të rëndësishme. Kjo vlen edhe për kryetrajnerin e ekipit të seniorëve”, tha presidenti i ri i FFM-së, Masar Omeragic.

Kujtojmë se Masar Omeragic u zgjodh president i ri i FFM-s, sot në Kuvendin e jashtëzakonshëm, i cili në këtë post zëvendëson Muhamed Sejdinin, i cili me 17 nëntor dha dorëheqje nga posti i të parit të futbollit në vend. /Telegrafi/