Marrëveshja me FMN në dyshim, mund të mos ripërtërihet

Marrëveshja me Fondin që pati për tre vjet rol vendimmarrës në politikat buxhetore mund të mbyllet në nëntor. Ahmetaj thotë se ekonomia ka hyrë në fazën e rritjes së saj dhe monitorimi nga FMN nuk është më i domosdoshëm

Qeveria ka dhënë sinjale se mund të vendosë të mos zgjasë marrëveshjen me Fondin Monetar Ndërkombëtar që mbaron në shkurt të vitit të ardhshëm.

Pasi i kërkoi ndihmë dhe kredi FMN-së në 2013 qeveria shqiptare po sheh mundësitë që t’i formësojë vetë buxhetet në vijim, duke i lënë Fondit vetëm misionin këshillues.

Televizioni Vizion Plus bëri me dije dje se kishte biseduar mbi këtë çështje me ministrin Arben Ahmetaj i cili ka lënë të kuptohej se edhe pse një vendim nuk ishte marrë marrëveshja mund të mos ripërtërihej.

Ministri i Financave Arben Ahmetaj, është shprehur se tashmë që ekonomia ka hyrë në fazën e rritjes së saj, nuk është më i domosdoshëm sa më parë monitorimi që Fondi i bën Shqipërisë.

Megjithatë ai ka thënë se nuk ka një vendimmarrje konkrete për këtë çështje.

Socialistët e kishin në programin e tyre rikthimin e misionit të përhershëm të FMN-së në Shqipëri.

Tre paketa fiskale dhe po ashtu tre buxhete janë bërë me ndihmën ekspertëve të Fondit që prej 2013 dhe në disa raste vendimet e tyre kanë rezultuar edhe të dhimbshme për taksapaguesit.

Por po ashtu ligjet e bëra në menaxhimin efiçent të buxhetit dhe ruajtjen e rrezikut të deficitit në buxhet nxorën Shqipërinë nga kërcënimet që vinin si pasojë e borxhit publik.

Kjo lëvizje duket edhe si një mundësi për të mbajtur FMN larg buxhetit gjatë një viti elektoral.

FMN u rikthye në Shqipëri në fund të vitit 2013-të, menjëherë pas ardhjes së qeverisë së re e cila firmosi një memorandum mirëkuptimi me Fondin Monetar Ndërkombëtar me qëllim marrjen e një huaje prej 330 milion eurosh.

Në këtë marrëveshje Shqipëria angazhohej që do të përmbushte 22 kritere për ruajtjen e stabilitetit ekonomik, konsolidimin fiskal dhe marrjen e masave për të mos krijuar më detyrime të prapambetura në sektorin publik.

Por kjo marrëveshje, e cila përfundon më 28 shkurt të vitit 2017-të nuk do të rinovohet më.

Qeveria do të mbajë vendin e saj në Fond, por jo me kushtet që ka sot, ku FMN ka rol vendimtar në shumë politika ekonomike që ndërmerren, që nga taksat e deri te mënyra se si shpenzohen paratë në buxhet.

Burimet thonë se deri në muajin nëntor, FMN do të ketë rolin monitorues të programit që ka firmosur me Shqipërinë, e pas këtij muaji pozicioni i saj do të jetë vetëm këshillues.