Drejtorja krijuese del në pension pas pothuajse dhjetë vjetësh në Dior
Në vitin 2016, Chiuri pasoi Raf Simons-in si drejtoreshë krijuese për veshje të gatshme, aksesorë dhe modën e lartë, duke u bërë gruaja e parë që drejtoi shtëpinë e famshme franceze të modës.
Me këtë, ajo nisi një kapitull të ri dhe të guximshëm në historinë e Dior-it, duke sjellë vlera të theksuara feministe në brend. Ajo shpesh përfshinte mesazhe të forta në koleksionet e saj dhe bashkëpunoi me artistë dhe artizanë nga e gjithë bota, duke hedhur dritë mbi traditat dhe aftësitë e tyre në skenën globale.
Nën udhëheqjen e saj, Dior u bë i famshëm për sfilatat e tij udhëtuese të modës, të cilat u zhvilluan në vende nga Skocia dhe Meksika në Greqi dhe Indi.
Kur bëhet fjalë për dizajnin, Chiuri gjithmonë i ka dhënë përparësi veshjes së lehtë, duke riinterpretuar shumë nga kodet dhe elementet dalluese të Christian Dior-it për gruan moderne, transmeton Telegrafi.
"Z. Dior krijoi dizajnë që ishin më konservatorë - gratë lëviznin më pak në atë kohë". “Obsesioni im është të krijoj copa që janë të lehta për t’u veshur, duke përdorur teknologjinë, por edhe njohuritë e modës së lartë”, tha ajo për ELLE UK shtatorin e kaluar gjatë njoftimit të shfaqjes.
Prapa skenave, Chiuri ka qenë një mbrojtëse e fortë për barazinë gjinore, duke lansuar iniciativa të tilla si programi i mentorimit Women@Dior, i cili zhvillohet në bashkëpunim me UNESCO-n.
Përpara se t’i bashkohej Dior-it, ajo kaloi 17 vjet te Valentino, ku punoi së bashku me Pierpaolo Piccioli-n, bashkëpunëtorin e saj krijues dhe mikun e saj prej shumë kohësh.
Në një deklaratë zyrtare, Delphine Arnault falënderoi drejtoreshën për "punën e saj të jashtëzakonshme me një vizion feminist frymëzues dhe kreativitet të jashtëzakonshëm, të mbushur me shpirtin e z. Dior".
“Pas nëntë vitesh, po largohem nga Dior, thellësisht e lumtur që më është dhënë kjo mundësi e jashtëzakonshme. Dëshiroj të falënderoj Z. Arnault për besimin e dhënë dhe Delphine për mbështetjen e saj. Jam veçanërisht mirënjohëse për punën e jashtëzakonshme të ekipeve dhe atelieve. Talenti dhe mjeshtëria e tyre më mundësuan të realizoj vizionin tim për një modë të angazhuar për gratë, në dialog të ngushtë me disa breza artistes. Së bashku, kemi shkruar një kapitull të jashtëzakonshëm dhe me ndikim, për të cilin jam thellësisht krenare,” – u shpreh @MariaGraziaChiuri. /Telegrafi/
