Maqedonia po shkon drejt zgjedhjeve, votohen ndryshimet e ligjeve sipas ”Përzhino 2”

Më në fund janë votuar ndryshimet e ligjeve të dala nga marrëveshja në mes katër partive politike parlamentare në Maqedoni, transmeton Telegrafi Maqedoni.

Bëhet fjalë për Mandatin e Qeverisë së Maqedonisë, ndryshimet në MPB, reformat në media, ligji për ndjekje penale dhe ligji për zgjedhjet.

Këto ndryshime dhe votimi i tyre do t’i hap rrugë partive politike për të diskutuar për datën e zgjedhjeve që sipas të gjitha gjasave do të jetë 11 dhjetori.

Gjatë seancës së djeshme pati edhe shumë kundërshtime në mes deputetëve në lidhje me ndryshimet dhe propozim amandamentet të cilët në disa raste u refuzuan nga deputeti i BDI-së Talat Xhaferi i cili tha se marrëveshja nuk duhet të ketë ndryshime, as edhe me amandamente teknike.

Përgjegjës për votimin e kësaj pakete sot janë Bekim Fazliu nga PDSH, Artan Grubi nga BDI, Ilija Dimovski nga OBRM-PDUKM dhe Goran Sugareski nga LSDM.

Më herët deputetët patën debate të ashpra për pikën e rendit të ditës- pyetje deputetësh./Telegrafi/