Maqedoni, ulet vdekshmëria në periudhën e paralindjes

Ministri i Shëndetësisë, Venko Filipçe sot ishte për vizitë në Klikën e Gjinekologjisë dhe Akusherisë në Repartin për Kujdes Intensiv dhe Terapi ku trajtohen foshnjat e lindura para kohe.

Siç thuhet në njoftimin e Ministrisë së Shëndetësisë, në bisedë me drejtoren e klinikës, Viktoria Jovanovska dhe me shefen e repartit, Renata Dimitriska, ministri u njoftua se në raportin për vitin 2020 është shënuar rënie te vdekshmëria e foshnjave të sapo lindura që trajtohen në Repartin për Kujdes Intensiv dhe Terapi.

Në vitin 2016 vdekshmëria nga numri i përgjithshëm i foshnjave në këtë repart ka qenë 25%, në vitin 2017 ka qenë 21%, në vitin 2018 ka qenë 16%, në vitin 2019 ka qenë 12% ndërsa sivjet është 10%.

“Ulja e vdekshmërisë në periudhën e paralindjes vjen si rezultat i investimeve që janë bërë gjatë këtyre tre viteve në këtë pjesë të shëndetësisë siç është në pajisje, edukim dhe zgjerim i ekipeve të eksperëve në Repartin për Kujdes Intensiv dhe në Klinikën për Gjinekologji dhe Akusheri”, thuhet në njoftimin e Ministrisë së Shëndetësisë./Telegrafi/