Maqedoni, nga fillimi i vitit Policia Financiare ka ngritur 28 padi penale

Nga fillimi i vitit deri në mes të qershorit, policia financiare ka ngritur 28 padi penale kundër 51 personave dhe 28 kompanive, duke iu referuar dyshimeve për 48 vepra penale.

Drejtori i Policisë Financiare, Arafat Muaremi tha se dëmet e shkaktuara në këto raste tejkalojnë 8 miliardë denarë dhe se akuzat tashmë janë dorëzuar në prokuroritë kompetente, përcjell Telegrafi Maqedoni.

Nga atje sot paraqitën tre akuza të reja penale për shpërdorim të detyrës zyrtare kundër drejtorit të RTVM-së, Marjan Cvetkovski, kundër drejtorit të Institutit për Shëndet Publik dhe kundër kompanisë Te-To SHT Shkup.

Megjithatë, pavarësisht nga numri i madh i paraqitjeve të parashtruara, Prokuroria Publike ka një numër dukshëm më të ulët të akuzave. I pyetur nga televizioni “Nova” se sa e kënaqur ishte ai me shpejtësinë me të cilën Prokuroria Publike po vepron mbi akuzat e tyre penale, Muaremi tha se prokurorët kanë nevojë për më shumë kohë për të proceduar gjobat në lidhje me krimin financiar.

“Deri më tani kemi pasur bashkëpunim të mirë me Prokurorinë Publike. Megjithatë, kjo është një çështje e krimit financiar, e cila duhet t’u shpjegohet prokurorëve publik, sepse ata janë avokatë dhe hetimet financiare duhet të sqarohen më shumë, që të jemi të bindur se ka krim me të vërtet në rastet, ndërsa dihet se për shkak të interesit financiar, keqpërdoren funksionet publike”, tha Muaremi./Telegrafi/