“Makerspace” dhe Universiteti “Ukshin Hoti” bashkojnë forcat për të nxitur inovacionin dhe ndërmarrësinë në rajonin e Prizrenit

Qendra e Inovacionit Makerspace dhe Universiteti “Ukshin Hoti” në Prizren kanë arritur një ujdi për bashkëpunim me qëllim të nxitjes së ndërmarrësisë, inovacionit dhe zhvillimit rajonal.

Sipas njoftimit, të dyja palët do të angazhohen për të krijuar një mjedis më të favorshëm për zhvillim të të rinjve, raporton Telegrafi.

“Në një zhvillim të ri dhe të rëndësishëm për Prizrenin dhe rajonin, Makerspace Innovation Center Prizren (MICP), përfaqësuar nga drejtori ekzekutiv, Enis Qafëleshi dhe Universiteti “Ukshin Hoti” Prizren (UUHP), përfaqësuar nga Rektori Prof. Asoc. Dr. Mentor Alishani, kanë nënshkruar një memorandum bashkëpunimi për të nxitur ndërmarrësinë, inovacionin dhe zhvillimin rajonal. Ky bashkëpunim synon krijimin e një ambienti të favorshëm për zhvillim për studentët, inovatorët dhe ndërmarrësit”, thuhet në njoftimin e Qendrës së Inovacionit Makerspace.

Aty theksohet se përmes këtij partneriteti, mundësohet bashkimi i forcave drejt zhvillimit të Prizrenit dhe më gjerë, përmes nxitjes së inovacionit.

“Partneriteti përqendrohet në aktivitete akademike dhe jashtëakademike, prej të cilave do të përfitojnë institucionet, komuniteti dhe rajoni i gjerë”, sqarohet në njoftim, raporton Telegrafi.

Bashkëpunimi në fjalë, sipas njoftimit, përfshin disa fusha kryesore, duke përfshirë organizimin e një strukture në Prizren që do të ofrojë hapësira dhe resurse për biznese startup dhe ndërmarrësit në përgjithësi.

“Një tjetër fokus i rëndësishëm është komercializimi i kërkimeve akademike, duke i kthyer ato në ndërmarrje të qëndrueshme dhe duke forcuar lidhjen midis akademisë dhe industrisë. Programet e inkubimit dhe akselerimit, si dhe sesionet e prezantimit për sigurimin e financimeve/investimeve, do të ndihmojnë studentët dhe ndërmarrësit të zhvillojnë idetë e tyre në biznese të suksesshme”, thuhet në njoftim.

Një pjesë tjetër e rëndësishme e këtij bashkëpunimi është edhe ofrimi i praktikave dhe mundësive të punës për studentët, duke i ndihmuar ata të fitojnë përvojë praktike, raporton Telegrafi.

“UUHP dhe MICP do të bashkëpunojnë për të siguruar fonde për projekte të përbashkëta dhe për të krijuar më shumë mundësi punësimi për studentët, në bashkëpunim me Qendrën e Karrierës dhe Qendrën për Kërkim, Inovacion dhe Transferim të Dijes”, theksohet në njoftim.

Në të njëjtën kohë, ceket se ky memorandum bashkëpunimi është një hap i rëndësishëm drejt një ekosistemi më të fortë inovacioni dhe ndërmarrësie në Prizren dhe më gjerë.

“Ky bashkëpunim premton të krijojë mundësi të reja për studentët, inovatorët dhe komunitetin e biznesit, duke lidhur akademinë me industrinë dhe duke rritur përkrahjen për biznese startup dhe ndërmarrësit në rajon”, përfundon njoftimi. /Telegrafi/