Ka dështuar sërish konstituimi i Kuvendit të Kosovës. LVV propozoi Albulena Haxhiun fillimisht për kryeparlamentare, por e njëjta nuk mori mbështetjen e mjaftueshme nga deputetët. E, pasi dështoi Haxhiu, LVV propozoi Donika Gërvallen për kryeparlamentare, por as ajo nuk u votua. Seanca u ndërpre, për të vazhduar më 22 gusht.
Njohësit e zhvillimeve politike kanë reaguar pas dështimit të seancës, derisa e vlerësuan si pozitive propozimin e bërë nga LVV, për Donika Gërvalla si kryeparlemntare, transmeton Telegrafi.
Hulumtuesi i Institutit Demokratik të Kosovës (KDI), Vullnet Bugaqku, tha se seanca konstituive e sotme u zhvillua në përputhje të plotë me procedurat kushtetuese të përcaktuara nga Kushtetuta, Rregullorja e Kuvendit dhe vendimet e Gjykatës Kushtetuese.
"Kjo paraqet një zhvillim pozitiv, pasi rikthehet kushtetutshmëria në procesin e konstituimit të Kuvendit. Megjithatë, rezultati i votimit dëshmon qartë se është i domosdoshëm një kompromis politik, konsensus dhe bashkëpunim ndërmjet partive parlamentare, në mënyrë që të zgjidhet një kandidaturë e pranueshme për të gjithë. Prej tash, bllokada është politike, jo më juridike", ka pohuar ai.
Edhe Drejtori i Institutit KIPRED, Lulzim Peci, tha se sot është një ditë shprese për konstituimin e Kuvendit të Kosovës.
"Vendimi i LVV që të propozoj një kandidat vetëm një here duhet të përshëndetet, pasi ky mund të shkurtoj kohën për konstituimin e Kuvendit. Por, në fund të fundit, gjëja më e rëndësishme është se u respektua vendimi i Gjykatës Kushtetuese, ndërsa të tjerat janë politike", tha Peci.
Po ashtu, edhe ish gjyqtari i Gjykatës Kushtetuese, Kadri Kryeziu, ka reaguar pas dështimit të seancës, ai i ka përgëzuar deputetët për sjelljen shembullore.
"Sjellje shembullore nga të gjithë deputetët. BRAVO! Sa i përket votimit KUNDËR nga PDK, LDK, AAK dhe Lista Serbe, me siguri se do të ketë diskutime interesante politike. Personalisht, nuk shoh asgjë problematike te ky zhvillim, përkundrazi një sharm i vërtetë i demokracisë", shkroi ai në Facebook.
Ndryshe, të hënën Gjykata Kushtetuese publikoi aktgjykimin e plotë për çështjen e konstituimit të Kuvendit.
Sipas aktgjykimi thuhet se Gjykata, në mënyrë të përmbledhur rikujton që përmes Aktgjykimit të të 26 qershorit 2025 lidhur me afatin për konstituimin e Kuvendit konstatoi që “Seanca Konstituive e Kuvendit është një akt kushtetues që duhet të përmbushet me sukses brenda 30 ditëve nga data e shpalljes zyrtare të rezultateve të zgjedhjeve, përmes përmbushjes të të gjitha elementeve thelbësore të konstituimit, përfshirë zgjedhjen e Kryetarit dhe nënkryetarëve. /Telegrafi/
