Lumezi: Në 2016-në kemi zgjidhur 63 mijë e 55 lëndë

Kryeprokurori i shtetit, Aleksandër Lumezi në një konferencë për media ka bërë të ditur se vitin e kaluar kanë zgjidhur 63 mijë e 55 lëndë.

Ai tha se këto shifra tregojnë shumë për punën e prokurorëve të shtetit dhe se janë 20 mijë lëndë më shumë se vitin e kaluar.

“Janë zgjedhur me mijëra vepra e lëndë penale që kanë pasur për fokus vepra të korrupsionit, krimit të organizuar, terrorizimit dhe shumë vepra të tjera. Prokurorët e shtetit gjatë vitit 2016 kanë zgjidhur gjithsejtë 63 mijë e 55 lëndë të natyrave të ndryshme”, bëri të ditur Lumezi.

Kryeprokurori Lumezi po ashtu tha se vëmendje e veçantë i është kushtuar kritereve që janë të nevojshme për liberalizimin e vizave.

Ai ka folur edhe për hetimeve e zyrtarëve, si ministrave, deputetë, etj.

“Kemi hetuar ministra në detyrë, ish ministra, deputetë, kryetarë të komunave, ish-kryetarë komunave, kryetarë gjykatash, ish gjyqtarë, prokurorë, policë, mjekë, drejtues të ndërmarrjeve publike, drejtorë komunalë, zyrtarë në gjykata, avokatë, noterë, operatorë ekonomikë dhe shumë zyrtarë të tjerë publikë”, tha ai.

Sipas tij, gjatë vitit 2016, po ashtu kanë zgjidhur 468 kallëzime penale të akuzave për korrupsion, si dhe janë sekuestruar pasuri në vlerë rreth 60 milionë euro, derisa kanë konfiskuar pasuri në vlerë mbi një milion euro.

“Si rezultat i punës së Prokurorit të Shtetit është arritur që të lirohen pothuajse të gjitha lokalet e uzurpuara, ky aksion i koordinuar ka bërë që të lirohen shumë lokale dhe objekte tjera dhe për këto raste deri më tani janë ngritur 8 aktakuza”, tha ai. /Telegrafi/