Luajti jashtë pozitës së tij, por Hadergjonaj thotë se respekton zgjedhjen e trajnerit: Nuk e kemi merituar fitoren

Florent Hadergjonaj ka qenë titullar në ndeshjen ndaj Greqisë, por në një pozitë krejt tjetër nga ajo që është natyrale e tij.

Hadergjonaj zakonisht luan si mbrojtës i djathtë, ndërsa në takim ndaj grekëve Challandes e kishte vendosur në të majtë.

Ai ka thënë fillimisht se Kosova nuk e ka merituar fitoren me paraqitjen që ka bërë mbrëmë.

“Pas çdo humbje nuk është njeri i kënaqur, sonte luajtëm për fitore, por në fund nuk u arrit”.

“Kemi bërë gabime që nuk jemi mësuar t’i bëjmë dhe mendoj se nuk e kemi merituar fitoren”, ka deklaruar Hadergjonaj.

Ai foli edhe për pozitën e tij në fushë, që ishte vendosur në krahun e majtë të mbrojtjes, por thotë se respekton zgjedhjen e trajnerit.

“Trajneri vendos për pozitën time. Ai vendos dhe unë jap maksimumin. Normalisht në krah të djathtë jam më mirë, pasi luaj me këmbë të djathtë”.

“Këtë e vendos trajneri, edhe lojtarë tjerë luajtëm jashtë pozitës, por ky është futbolli, kur kemi mungesa duhet të adaptohemi”.

Krejt në fund Hadergjonaj tha se i kanë munguar jashtëzakonisht shumë tifozët pasi ata janë motivi i lojtarëve. /Telegrafi/