Propozimi evropian dhe plani i zbatimit, gjithçka nga takimet në Ohër

Ka filluar të mbahet takimi trepalësh ndërmjet kryeministrit Albin Kurti, presidentit serb, Aleksandar Vuçiq me ndërmjetësimin e shefit të Politikës së Jashtme të Bashkimit Evropian, Josep Borrell dhe të dërguarit të BE-së, Miroslav Jajçak.

Para takimit trepalësh, Borrell kishte takime të ndara me Kurtin dhe Vuçiqin.

Ndryshe, zëdhënësi i BE-së, Peter Stano në një deklaratë për media theksoi se në fund të takimit, përfaqësuesi i Lartë, Borrell do të dalë me një deklaratë për media.

Ai tha se kjo deklaratë pritet të bëhet në orët e mbrëmjes.

Zëdhënësi i Bashkimit Evropian, Peter Stano nuk ka dhënë detaje të takimit trepalësh në Ohër të Maqedonisë, ndërmjet përfaqësuesve të Bashkimit Evropian, kryeministrit Albin Kurti dhe presidentit të Serbisë, Aleksandar Vuçiq.

Stano në një paraqitje para gazetarëve tha se përfaqësuesi i Lartë i Politikës së Jashtme të BE-së, Josep Borrell do të dalë në fund të ditës me një deklaratë për media, por që nuk do të pranohen pyetje të gazetarëve.

“Në fund të këtij takimi do të vijë këtu…nuk e dimë kohën, nuk e dimë sa do të zgjasë takimi…por do të ju informojmë…”, tha Stano, duke shtuar se deklarata nga Borrell mund të jetë në orët e vona të pasdites ose në mbrëmje.

“Nuk do të them asgjë për përmbajtjen. I përmbahemi rregullave dhe nuk do të flasim për atë që është  diskutuar… do të ketë deklaratë pas takimit”, tha ai.

Ka nisur të mbahet takimi i shefit të Politikës së Jashtme të Bashkimit Evropian, Josep Borrell dhe të dërguarit të BE-së për dialogun, Miroslav Lajçak me kryeministrin e Kosovës, Albin Kurti.

Në takim do të diskutohet plani i zbatimit të Propozimit evropian.

Pas këtij takimi është ai trelateral, mes përfaqësuesve të BE-së, kryeministrit Albin Kurti dhe presidentit serb, Aleksandar Vuçiq, ndërsa pritet të mbahet rreth orës 13:30.

Në prag të takimit të radhës të nivelit të lartë në kuadër të dialogut për normalizimin e marrëdhënieve Kosovë–Serbi, kryeministri i Republikës së Kosovës, Albin Kurti, takoi sot në  Ohër zëvendësndihmës Sekretarin e Shteteve të Bashkuara për Çështje Evropiane dhe Euroaziatike dhe njëherësh të dërguarin e posaçëm të Shteteve të Bashkuara të Amerikës për Ballkanin Perëndimor, Gabriel Escobar.

Folën për takimin e sotëm, rëndësinë dhe pritjet nga ky takim.

Kryeministri Kurti e falënderoi Escobar për mbështetjen vazhdueshme të tij dhe të ShBA-së në procesin e dialogut, duke theksuar këtu përkushtimin dhe qasjen konstruktive të Qeverisë së Republikës së Kosovës në këtë fundjavë dhe për gjatë gjithë procesit.​

Djali i veprimtarit të çështjes kombëtare Ukshin Hoti, njëherësh kryetar i Komisionit qeveritar për personat e pagjetur, Andin Hoti sot është i pranishëm në Ohër si pjesë e delegacionit të Kosovës.

Pjesë e këtij delegacioni me në krye kryeministrin e vendit, Albin Kurti janë po ashtu edhe zëvendëskryeministri i Kosovës, Besnik Bislimi si dhe ministri i Kulturës, Hajrulla Çeku.

Varka e Policisë së Maqedonisë së veriut është duke qëndruar mbi liqen të Ohrit, në kuadër të masave të shtuara të sigurisë për takimin trilateral mes kryeministrit të Kosovës, Albin Kurti dhe presidentit të Serbisë, Aleksandar Vuçiq me ndërmjetësim të përfaqësuesve të Bashkimit Evropian (BE).

Takimi do të zhvillohet në “Vila Biljana”, ish-rezidenca verore e ish-presidentit komunist të ish-Jugosllavisë, Josip Broz Titos, e cila tashmë është një kompleks vilash shtetërore të Maqedonisë së Veriut.

Ka filluar në Ohër takimi dypalësh i përfaqësuesit të Lartë të BE-së për Politikë të Jashtme dhe Siguri, Josep Borrell dhe përfaqësuesit special të BE-së për dialogun Beograd-Prishtinë, Miroslav Lajçak me presidentin e Serbisë, Aleksandar Vuçiq,

Zyrtarët evropianë gjithashtu do të takohen me kryeministrin e Kosovës, Albin Kurti.

Në fund është planifikuar një takim trepalësh mes Kurtit, Vuçiqit dhe zyrtarëve të Bashkimit Evropian.

Sekretari i NATO-s, Jens Stoltenberg ka thënë sot se pret konstruktivitet nga kryeministri i Kosovës, Albin Kurti dhe presidenti i Serbisë, Aleksandar Vuçiq nga takimi në Ohër të Maqedonisë së Veriut.

“Bisedimet e ndërmjetësuara nga BE në Ohër janë të rëndësishme dhe pres që presidenti i Serbisë, Aleksandar Vuçiq dhe kryeministri Albin Kurti të angazhohen në mënyrë konstruktive dhe të bëjnë përparim. Ky është çelësi për stabilitetin e qëndrueshëm dhe të ardhmen evropiane dhe euroatlantike të rajonit. NATO, KFOR vazhdon të punojë për një Kosovë stabile dhe paqësore”, thuhet në postim. /Telegrafi/

Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, para takimit të sotëm ka thënë se sytë e BE-së dhe Ballkanit Perëndimor janë sot te Ohri.

“Pas diplomacisë intensive të anijes ndërmjet Beogradit dhe Prishtinës, do të diskutojmë me presidentin e Serbisë, Aleksandar Vuçiq dhe kryeministrin e Kosovës, Albin Kurti. Aneksi i zbatimit – një pjesë integrale e Marrëveshjes për rrugën drejt normalizimit të marrëdhënieve”, ka shkruar Borrell në Twitter.

Publicisti Veton Surroi ka komentuar takimin e sotëm në Ohër, ndërmjet kryeministrit Albin Kurti dhe presidentit të Serbisë, Aleksandar Vuçiq.

Sipas tij, negociatat ndërmjet Kosovës dhe Serbisë kanë të bëjnë me gjetjen e një rruge për t’i dhënë fund konfliktit.

“Një informacion kontekstual mbi luftën/negociatat: më shumë civilë (10.000 prej të cilëve 1.000 fëmijë) u vranë në Kosovë sesa në Ukrainë për 1 vit luftë. Negociatat e Kosovës dhe Serbisë në Ohër kanë të bëjnë me gjetjen e një rruge për t’i dhënë fund konfliktit, 24 vjet më pas. Vështirë!”, ka shkruar Surroi në Twitter.

Kryeministri i Kosovës, Albin Kurti ka thënë sot se është optimist për takimin që do të zhvillohet sot në Ohër të Maqedonisë së Veriut.

Ai po ashtu tha se sot në takimin trilateral do ta bëjë më të mirën për Kosovën.

“Nga këtu do të shkoj për takim me presidentin Pendarovckin dhe pastaj kemi takimet bilaterale me ndërmjetësit evropian, përkatësisht me Përfaqësuesin e Lartë të BE-së për Politikë të Jashtme dhe Siguri Josep Borell dhe emisarin e tij për Ballkan dhe dialogun Kosovë-Serbi, Miroslav Lajcak që i paraprinë takimit trilateral.

Liqeni i Ohrit është liqen tektonik, mirëpo është vend i qetë dhe i bukur siç po e shihni dhe ju vet që jeni këtu. Jam optimist, i vëmendshëm dhe do të bëjmë më të mirën për Republikën e Kosovës, kushtetutshmërinë, sovranitetin, integritetin territorial, interesin publik dhe të popullit për të gjithë qytetarët pa dallim sepse unë jam kryeministër i Republikës së Kosovës”, ka thënë Kurti.

Ambasadori i Mbretërisë së Bashkuar në Kosovë, Nicholas Abbott ka thënë sot se me vullnet politik, guxim e pragmatizëm sot mund të ketë një rezultat pozitiv nga bisedimet në Ohër.

Abbott në një postim në Twitter shkruan se me Mbretëria e Bashkuar e mbështetë dialogun e lehtësuar nga Bashkimi Evropian.

“Një rezultat pozitiv nga bisedimet e Ohrit për normalizimin e marrëdhënieve Kosovë-Serbi mund të ndodhë me vullnet politik, guxim dhe pragmatizëm nga kryeministri Albin Kurti dhe presidenti i Serbisë, Aleksandar Vuçiq.

Do të përfitojnë të gjithë qytetarët dhe komunitetet. Mbretëria e Bashkuar mbështet Bashkimin Evropian dhe është i gatshëm të ndihmojë në zbatimin”, shkruan Abbott.

Analisti dhe opinionisti kosovar Gazmir Raci, dikur pjesë e delegacionit të Kosovës në bisedimet me Serbinë, ka folur për takimin e sotëm të Ohrit dhe pritshmëritë e tij.

Raci në ‘RADIO 1’, ka thënë se nga takimi i sotëm i Ohrit, nuk pret që të bëhet historia, porse pret që palët të zotohen se një marrëveshje me zbatim të plotë dinamik ta firmosin në Paris ose Berlin më 23 ose 24 Mars.

‘Nuk pres sot historinë, porse pres që palët të zotohen se një marrëveshje me zbatim të plotë dinamik ta firmosin në Paris ose Berlin më 23 ose 24 Mars”, tha Raci. /Telegrafi/

Kryeministri i Kosovës, Albin Kurti dhe delegacioni qeveritar ka zhvilluar një takim me kryetarin e BDI-së, Ali Ahmeti para nisjes zyrtare të takimeve në Ohër të Maqedonisë, që priten të fillojnë në ora 10:00.

Në shoqërimin e Kurtit është parë zëvendëskryeministri Besnik Bislimi dhe ministri i Kulturës, Hajrulla Çeku.

Fotografi i Telegrafit, Ridvan Slivova ju sjell fotografi nga rezidenca shtetërore në Ohër të Maqedonisë.

Ohri, ky qytet turistik i Maqedonisë së Veriut sot do të jetë vendtakim i delegacioneve të Kosovës dhe Serbisë me ndërmjetësimin e Bashkimit Evropian (BE), ndërkaq i pranishëm do të jetë edhe i dërguari i Shteteve të Bashkuara të Amerikës (ShBA), Gabriel Escobar.

Po ashtu, në rezidencën në Ohër ku do të mbahet takimi në orët e mëngjesit janë parë duke biseduar kryetari i BDI-së Ali Ahmeti si dhe zëvendëskryeministri i Kosovës, Besnik Bislimi.

Bislimi është parë duke biseduar edhe me të dërguarin e BE-së, Miroslav Lajçak para nisjes zyrtare të takimeve.

Zyra e Bashkimit Evropian ditë më parë ka bërë publike agjendën e takimeve të 18 marsit që do të mbahen në Ohër të Maqedonisë së Veriut.

Takimet në Ohër do të fillojnë nga ora 10:00. Në njoftimin e zyrës së Bashkimit Evropian bëhet e ditur se takimi do të zhvillohet në rezidencat shtetërore.

Duke filluar nga ora 10:00, shefi i politikës së jashtme të Bashkimit Evropian, Josep Borrell, dhe i dërguari i BE-së për dialogun Kosovë-Serbi, Mirosllav Lajçak do të zhvillojnë takime të ndara me kryeministrin e Kosovës Albin Kurti dhe me presidentin serb Aleksandar Vuçiq.

Në takim do të diskutohet për Propozimin e BE-së për normalizimin e marrëdhënieve ndërmjet Kosovës dhe Serbisë.

Atje do të jetë i pranishëm Përfaqësuesi i Lartë i BE-së, Josep Borell bashkë me emisarin e BE-së për dialogun, Miroslav Lajcak.

I pranishëm do të jetë edhe i dërguari i posaçëm i Uashingtonit për Ballkanin Perëndimor, Gabriel Escobar.

Ai do të marrë pjesë në cilësinë e vëzhguesit në rundin e ri të dialogut mes Kosovës dhe Serbisë.

Drejtori i Institutit të Kosovës për Politikat Evropiane (EPIK), Demush Shasha, ditë më parë në emisionin “Përballje” në Telegrafi.com me kryeredaktorin Muhamet Hajrullahu, ka folur për takimin e 18 marsit mes kryeministrit të Kosovës, Albin Kurti dhe presidentit të Serbisë, Aleksandar Vuçiq në Ohër.

Shasha ka thënë se në këtë takim pritet të vazhdohet “diskutimi i mirë”, i cili u zhvillua më 27 shkurt në Bruksel, ku palët janë darkoduar për marrëveshjen bazë për normalizimin e marrëdhënieve.

Sipas tij, në Ohër palët do të shkojnë një hap tutje – të dakordohen për planin e zbatimit të kësaj marrëveshje.

“Ajo për të cilën nuk janë darkoduar është plani i zbatimi, respektivisht aneksi i zbatimi. Në Ohër pritet që të shkohet një hap tutje. Pra, palët të dakordohen për aneksin e marrëveshjes”, ka deklaruar Shasha, duke shtuar se nuk pritet që të ketë nënshkrim ceremonial.