“Liri për çlirimtarët”, “Drejtësi, jo politikë”, disa të rinj protestojnë para EULEX-it ku është duke qëndruar Thaçi

Ish-presidenti i Kosovës, Hashim Thaçi, është duke qëndruar një vizitë në Kosovë. Gjykata Speciale ka lejuar vizitën e Thaçit pesë ditë pasi vdekjes së babait të tij.

Thaçi po qëndron në zyret e EULEX-it, në Fushë Kosovë, ku edhe po pranon vizita nga familjarët e tij, transmeton Telegrafi.

Deri tani ai ka takuar bashkëshorten e tij dhe po ashtu vëllezërit.

E, derisa Thaçi po qëndron në ambientet e EULEX-it, disa të rinj janë duke protestuar, ku edhe po kërkohet liri për të.

“S’kemi heronj për të sakrifikuar”, “Liri për çlirimtarët”, “Liria ka emër”, “Drejtësi, jo politikë”, janë disa mbishkrimet e vendosura në pankartat që ata po mbajnë.

Thaçi ka arritur të premtën në Kosovë, ku edhe ka vizituar varrin e babait të tij dhe kishte vendosur një kurorë me lule.

Lexo po ashtu Dita e dytë e qëndrimit në Kosovë, Thaçit i shkojnë për vizitë vëllezërit e tij

Vizitën e Thaçit në Kosovë e konfirmuar nga Specialja, duke njoftuar se ai është lejuar të bëjë nderime dhe të jetë me familjen e ngushtë

“Mund të konfirmoj se për arsye bindëse humanitare, trupi gjykues dhe gjyqtari i procedurës paraprake kanë udhëzuar Sekretarin që të menaxhojë një vizitë në paraburgim në Kosovë për Hashim Thaçin që t’i bëjë nderimet dhe të jetë me familjen e ngushtë. I akuzuari mbetet në paraburgim dhe në paraburgim nga Dhomat e Specializuara”, ka thënë për Telegrafin, Michael Doyle, zëdhënës i Dhomave të Specializuara të Kosovës.

Thaçi nuk ishte lejuar nga Specialja të merrte pjesë në varrimin e babait të tij.

Ish-presidenti i Kosovës vazhdon të mbahet në paraburgim që nga viti 2020./Telegrafi/