Liga Premier: Kasami, ndër më të mirët e javës

Pajtim Kasami shënoi një gol spektakolar të hënën për ta rreshtuar veten në mesin e emrave si Mesut Ozil, Sergio Aguero e Steven Gerrard në ekipin më të mirë të javës, e zgjedhur nga Sky Sports.

Shqiptari nga Struga e Maqedonisë, i cili aktivizohet për përfaqësuesen e Zvicrës, shënoi golin më të bukur të javës dhe ndoshta njërin nga më të mirët e sezonit, në fitoren 4-1 të Fulhamit ndaj Crystal Palace.

“Goli i vikendit? Goli i muajit? Goli i sezonit? Më i miri gol ndonjëherë i shënuar? Nëse nuk e keni parë golin e Pajtim Kasamit atëherë merreni karrigen, merreni një gotë çaji dhe klikoni videon (poshtë). Goli i Kasamit sigurisht se do të përfshihet në çdo skeç promovues të Ligës Premier”, shkruan mes tjerash Sky Sports.
Kasami rreshtohet në krahun e djathtë të mesfushës, me Mesut Ozil që pushton qendrën (pas dy golave për Arsenalin në fitoren 4-1 ndaj Norwich Cityt), dhe me Hazard që rreshtohet në krahun e majtë (po me dy gola në fitoren 4-1 të Chelseat ndaj Cardiff).

I vetëm në sulmin e javës ndodhet Segio Aguero që ndihmoi Manchester Cityn të nxjerrë fitoren e parë të sezonit në udhëtim, duke mposhtur West Ham United me rezultat 2-0.

Për t’u përmendur janë edhe Steven Gerrard, i cili shënoi golin e 100-të në Ligën Premier në barazimin e Liverpoolit 2-2 ndaj Newcastle United, dhe Jack Wilshere, që shënoi në fitoren e Arsenalit. Të dy lojtarët rreshtohen në pozitën e mesfushorëve defensivë.

Në vazhdim , ekipi më i mirë i vikendit i zgjedhur nga Sky Sports:

Portier: Asmir Begovic (Stoke City)

Mbrojtës: Micah Richards (Manchester City); Laurent Koscielny (Arsenal); Curtis Davies (Hull City); Jan Vertonghen (Tottenham)

Mesfushorë defensiv: Steven Gerrard (Liverpool); Jack Wilshere (Arsenal)

Mesfushorë ofensiv: Pajtim Kasami (Fulham); Mesut Ozil (Arsenal); Eden Hazard (Chelsea)

Sulmues: Sergio Aguero (Manchester City)

/Telegrafi/