Lewandowski akuzohet për mashtrim, bleu dy diploma master në Poloni

Mediat polake raportuan të premten se ylli i futbollit, Robert Lewandowski akuzohet për mashtrim, pasi besohet se ka blerë dy diploma master në Universitetin privat të Lodzit.

Sipas agjencisë së lajmeve Onet, emri i sulmuesit të Barcelonës figuron në një listë të gjerë që lidhet me një hetim policor për trafikun e diplomave, madje ekziston dyshimi se ai është diplomuar dy herë në Universitetin privat të Lodzit, edhe pse nuk është paraqitur kurrë për të dhënë provimet.

Në qendër të kësaj polemike është një ish-drejtor sportiv i quajtur Zbigniew D., por personi që hodhi dyshime për kapitenin e kombëtares polake ishte një ish-mësues, i cili konfirmoi se lojtari nuk ishte paraqitur në provimin e lëndës së tij.

“Robert Lewandowski bleu diplomën e tij nga një universitet privat në Lodz. E shkruaj me gjithë përgjegjësi sepse ai “ka kaluar” dy provime te unë. Të gjitha këto i kam zbuluar gjatë seancës si dëshmitare në këtë rast të neveritshëm”, ka raportuar Barbara Mrozinska në një publikim në X, më 7 korrik.

Përveç këtyre dy diplomave tashmë nën dyshim, karriera akademike e Lewandowski përfshin edhe një diplomë dhe një diplomë master në edukimin fizik të marrë në Universitetin e Varshavës, pasi u deshën 13 vjet për t’i përfunduar ato.

Lexo po ashtu Drejtori i Topit të Artë tregon nëse do t’ia japin çmimin Lewandowskit

Në fakt, koha gjatë u justifikua me pajtimin mes fillimit të veprimtarisë së tij profesionale dhe karrierës akademike, diçka që përforcon dyshimet e hetimit, të cilat vënë në pikëpyetje sesi lojtari kishte kohë të punonte në dy mastera, kur tashmë kishte ende një tjetër pa e kryer.

Shtypi polak po ashtu thekson se avokatët e lojtarit kanë treguar disponueshmëri të plotë për të zgjidhur çështjen. /Telegrafi/