Leutrim Gërvalla: Zëri që sfidon kufijtë dhe frymëzon me muzikën e tij

Këngëtari Leutrim Gërvalla është një simbol i fuqishëm i forcës, pasionit dhe qëndrueshmërisë. Përmes zërit të tij, ai kapërcen kufijtë dhe krijon një botë ku muzika bëhet dritë dhe shpresë

Çdo notë që luan, çdo melodi që krijon, është një dëshmi e shpirtit të tij krijues dhe të pathyeshëm, pavarësisht sfidave. Talentin e tij nuk e kufizon mungesa e shikimit, por e fuqizon dashuria për artin dhe vullneti për të frymëzuar botën.

Leutrimi na kujton se ëndrrat nuk kanë kufij dhe se çdo pengesë mund të tejkalohet me guxim dhe besim në vetvete. Aftësia e tij për të ndjerë ritmin, melodinë dhe emocionin është një dhuratë e rrallë që prek zemrat e të tjerëve.

Vështirësitë mund të jenë të shumta, por aftësia për të sjellë bukuri dhe frymëzim përmes muzikës është një fuqi që tejkalon çdo pengesë.

Me një karrierë të nisur qysh në fëmijëri, Leutrimi mbetet një nga artistët që vlerësohet për zërin dhe shpirtin artistik që e karakterizon. Ai, vazhdon të jetë aktiv në skenën muzikore, duke sjellë projekte të reja dhe duke inspiruar me talentin dhe përkushtimin e tij.

Por, cilat ishin synimet, preokupimet, aspiratat, dëshirat dhe planet për të ardhmen, mësoni nga intervista tepër e veçantë, në vijim.

Fëmijëria është një periudhë e mbushur me meloditë dhe ritmet që gjithmonë na ndihmojnë të shprehim veten. Si e keni përjetuar atë periudhë kreative dhe eksploruese?

Fëmijëria ime ka qenë e mbushur me tinguj, me këngë dhe me dashuri për muzikën. Që i vogël e dija që muzika do të ishte pjesë e pandashme e jetës sime. Nuk mund ta shihja botën, por e ndjeja atë përmes tingujve, përmes vibrimeve të muzikës dhe zërave që më rrethonin. Ishte një periudhë e eksplorimit dhe e zbulimit të vetes, ku çdo tingull më udhëhiqte drejt një bote të re, plot emocione dhe inspirim.

Ju, si fëmijë keni hyrë në artin e këngës me shumë pasion dhe entuziazëm. Si rrodhi karriera juaj, tashmë e begatuar?

Gjithçka nisi natyrshëm. Dashuria për këngën ishte aty gjithmonë, dhe me kalimin e kohës ajo u kthye në profesion. Nga pjesëmarrja ime e parë në skenë e deri te projektet e fundit muzikore, rruga ka qenë e mbushur me sfida, por edhe me momente magjike. Këndimi me artistë të njohur, bashkëpunimet dhe mbështetja e publikut më kanë dhënë forcën për të vazhduar.

Muzika ka një forcë magjike për të lidhur emocionet, është një mundësi për të shpërthyer dhe për të komunikuar në një mënyrë të veçantë. Si e përjetoni këtë në mënyrën tuaj unike?

Për mua, muzika nuk është thjesht tingull, por është ndjenjë, është një botë që e ndjej në shpirt. Kur këndoj, e jetoj çdo notë, çdo melodi, dhe ndiej se jam pjesë e diçkaje më të madhe. Muzika është mjeti im për të komunikuar me botën, për të shprehur gjithçka që ndjej dhe për të inspiruar të tjerët.

Cilat kanë qenë momentet më të rëndësishme në rrugëtimin tuaj muzikor?

Një nga momentet më të veçanta ishte këndimi me Parashqevi Simakun në Pejë, në vitin 2001. Ishte një moment që më mbeti në zemër, një përjetim që e vlerësoj thellë. Gjithashtu, një eksperiencë e madhe dhe kulmi i suksesit për mua ka qenë performanca në X Factor Albania. Ky spektakël më dha një mundësi të jashtëzakonshme për të shfaqur talentin tim dhe për të përjetuar emocione të paharrueshme.

A ka ndonjë zhanër ose instrument që e ndjeni më afër zemrës suaj?

Unë gjithmonë kam pëlqyer muzikën e lehtë dhe popullore, por jam i hapur ndaj zhanreve të ndryshme. Sa i përket instrumenteve, kënga është instrumenti im më i fuqishëm, pasi zërimi dhe interpretimi janë mjeti im kryesor për të shprehur emocionet.

Si i keni tejkaluar paragjykimet ose kufizimet që të tjerët mund të kenë për ju?

Me punë, me besim dhe me vullnet të palëkundur. Unë besoj se pengesat ekzistojnë për të na forcuar dhe jo për të na ndalur. Nuk kam lejuar kurrë që paragjykimet të më ndalin, sepse di çfarë dua dhe besoj në vetvete. Në fakt, gjatë gjithë jetës sime nuk kam hasur në asnjë pengesë në aspektin e integritetit ose integrimit. Shoqëria më ka pranuar pa paragjykime, dhe gjithmonë e kam ndjerë veten të barabartë me të tjerët.

Si e shihni të ardhmen tuaj në muzikë? A ka ndonjë ëndërr që ende dëshironi ta realizoni?

E ardhmja ime në muzikë është një rrugëtim i hapur. Kam shumë projekte në mendje, shumë ëndrra që dua t’i realizoj. Synoj të vazhdoj të krijoj muzikë që prek zemrat e njerëzve dhe të sjell diçka të re dhe të veçantë në skenën muzikore.

Kënd dëshironi të falënderoni për mbështetje në udhëtimin tuaj profesional?

Në fund, dua të falënderoj familjen time për sakrificën, mundin e palodhur dhe çdo gjë që kanë bërë për mua. Pa mbështetjen e tyre, nuk do të isha këtu ku jam sot. Gjithashtu, dua të falënderoj shoqërinë time, e cila më ka pranuar gjithmonë pa asnjë paragjykim dhe më ka bërë të ndiej veten të barabartë me të tjerët. Integrimi dhe mbështetja e tyre kanë qenë një forcë e madhe për mua dhe për këtë do të jem gjithmonë mirënjohës.

Çfarë këshille do të u jepnit të rinjve që përballen me sfida të ngjashme dhe ëndërrojnë të ndjekin pasionin e tyre?

Mos u ndalni kurrë! Besoni në veten tuaj, punoni fort dhe mos u dorëzoni para sfidave. Çdo pengesë mund të tejkalohet me vullnet dhe dashuri për atë që bëni. Mos lejoni që kufizimet e të tjerëve t’ju ndalin, sepse nëse keni një ëndërr, ju mund ta bëni realitet. /Telegrafi/