LDK kërkon seancë të jashtëzakonshme për shkak të mos liberalizimit të vizave

Lidhja Demokratike e Kosovës nëpërmjet një komunikate për media kanë kërkuar seancë të jashtëzakonshme në lidhje me mos liberalizim të vizave.

Ata për këtë ia hedhin fajin Qeverisë aktuale si dhe kryeministrin e tanishëm Ramush Haradinaj dhe zëvendësin e tij Fatmir Limaj.

“Kryeministri i sotëm dhe zëvendësi i tij Limaj dikur pengonin me dhunë e intriga përmbushjen e kritereve për liberalizim të vizave. Atëherë e fajësonin Bashkimin Evropian, i cili deklaronte se po rrezikohet liberalizimi i vizave deri pas zgjedhjeve të vitit 2019 në Bashkimin Evropian”, thuhet në komunikatën e LDK-së.

Sipas LDK-së sot, kur ai paralajmërim është bërë fakt, përdoruesit e dhunës dhe intrigave, tash bashkë me partnerët e tyre qeverisës, sërish po fajësojnë Bashkimin Evropian.

“Dështimin në liberalizimin e vizave dhe anëtarësimin në Interpol po e shesin si dështim të Evropës, në rastin e liberalizimit të vizave, dhe të sigurisë globale, në rastin e Interpolit”, thuhet në komunikatë.

LDK mendon se Kosovës po i mbyllen dyert sepse udhëhiqet prej njerëzve të izoluar.

“Këta po mundohen ta shpërthejnë izolimin e tyre, duke e izoluar Kosovën. Por, Kosova dhe qytetarët e saj do ta shpërthejnë izolimin duke i izoluar këta udhëheqës të papërgjegjshëm”, thuhet në komunikatën e partisë që udhëhiqet nga Isa Mustafa.

LDK kërkon që Kuvendi duhet të mblidhet në seancë të jashtëzakonshme për të diskutuar këtë çështje ndërsa kërkon dorëheqjen e ekzekutivit. /Telegrafi/