Kuvendi mblidhet nesër, nuk e ka në rend dite mandatin e EULEX-it

Qeveria e Kosovës në mbledhjen e mbajtur sot ka bërë të ditur se është arritur marrëveshja me EULEX-in për vazhdimin e mandatit edhe për dy vite.

Ndërkaq po ashtu sot në orën 18:00 qeveria pritet të mbajë edhe një tjetër mbledhje nga ku pritet të procedohet në Kuvend marrëveshja me EULEX-in për t’i vazhduar mandatin këtij misioni.

Megjithatë nuk dihet se kur do të jetë dita kur vazhdimi i mandatit të EULEX të diskutohet dhe të votohet nga Kuvendi i Kosovës.

Kjo për faktin se në njoftimin e dërguar nga Kuvendi për seancën e nesërme në pikat e rendit të ditës nuk shkruan askund votimi i projektligjit për vazhdimin e mandatit të EULEX-it.

Këto janë 17 pikat e seancës së nesërme:

1. Koha për deklarime jashtë rendit të ditës,

2. Koha për pyetje parlamentare,

3. Miratimi i procesverbalit nga seanca e mëparshme,

4. Votimi i Projektligjit nr. 05/L-098 për Ratifikimin e Marrëveshjes Financiare ndërmjet Qeverisë së Republikës së Kosovës dhe Bankës Evropiane për Investime për Projektin e Rehabilitimit të Linjës Hekurudhore 10,

5. Zgjedhja e tre (3) anëtarëve të Bordit për Ankesa të Mediave,

6. Zgjedhja e Drejtorit të Agjencisë Kundër Korrupsionit,

7. Shqyrtimi i dytë i Projektligjit për ndryshimin dhe plotësimin e Ligjit nr. 03/L-019 për aftësimin, riaftësimin profesional dhe punësimin e personave me aftësi të kufizuar,

8. Shqyrtimi i dytë i Projektligjit nr. 05/L-077 për regjistrimin dhe ofrimin e shërbimeve dhe masave për punësimin e të papunëve, punëkërkuesve dhe punëdhënësve,

9. Shqyrtimi i dytë i Projektligjit nr. 05/L-081 për Energjinë,

10. Shqyrtimi i dytë i Projektligjit nr. 05/L-085 për Energjinë Elektrike,

11. Shqyrtimi i dytë i Projektligjit nr. 05/L-084 për Rregullatorin e Energjisë,

12. Shqyrtimi i dytë i Projektligjit nr. 05/L-082 për Gazin Natyror

13. Shqyrtimi i Propozim-vendimit për caktimin e pagës së Auditorit të Përgjithshëm të Republikës së Kosovës,

14. Shqyrtimi i Raportit të Organit Shqyrtues të Prokurimit për vitin 2015,

15. Shqyrtimi i Raportit të Komisionit Rregullativ të Prokurimit Publik për vitin 2015,

16. Shqyrtimi i Raportit të Agjencisë Kosovare të Pronës për vitin 2015,

17. Shqyrtimi i Raportit të Këshillit të Pavarur Mbikëqyrës për Shërbimin Civil të Kosovës për vitin 2015. /Telegrafi/