Kurti vizitoi Qendrën këshilluese për gra, premton fuqizimin ekonomik të tyre

Kryeministri Albin Kurti ka premtuar mbështetje për gratë e vajzat dhe fuqizimin ekonomik të tyre, gjatë një vizite në Qendrën këshilluese për gra (Consulting Center for Women).

Rëndësia e bashkëpunimit ndërmjet Qeverisë dhe organizatave joqeveritare u theksua në takimin me Sanija Murati, drejtoreshë e organizatës joqeveritare “Lady”.

“U potencua domosdoshmëria e nismave të përbashkëta për ta shpirë përpara zhvillimin dhe barazinë në shtetin tonë. U tha se nuk mund të ketë barazi në shoqëri, pa barazi gjinore”, thuhet në njoftimin e Zyrës së Kryeministrit.

Në kuadër të Pakos së ringjalljes ekonomike, vëmendje e veçantë i është dhënë fuqizimit të grave në ekonomi e shoqëri, tha Kryeministri Kurti.

“Ai theksoi veprimet e ndërmarra nga Qeveria, sikurse Masa 1.3 Mbështetja e Punësimit të Grave, në kuadër të së cilës ka pasur 3.571 punëtore përfituese dhe 1.490 biznese përfituese; si dhe masa 2.1.2 Mbështetja e bizneseve, që janë në pronësi të grave, ku deri më tani, kemi pasur 43 aprovime. Në total, vlera e subvencionimit është 491.988 euro, kurse vlera e kreditimit të mundësuar tejkalon 3 milionë euro”, thuhet tutje në njoftimin e Zyrës së Kryeministrit.

Në këtë takim, u bisedua për punën e Qendrës këshilluese për gra drejt arritjes së kompetencave profesionale dhe personale të grave dhe vajzave, duke krijuar mundësi të integrimit në shoqëri përmes projekteve socio-ekonomike./Telegrafi/