Kundërshtari politik i Putinit, Alexei Navalny në gjendje të rëndë shëndetësore

Alexei Navalny është në një situatë “kritike” pas helmimit të mundshëm, tha një bashkëpunëtor i tij i ngushtë. Lideri i opozitës ruse raportohet se kishte dhimbje të forta barku ndërsa një autoambulancë u dërgua në burg.

Navalny, politikani më i shquar i opozitës ruse, ka pasur dhimbje të forta stomaku në burg, të cilat mund të jenë rezultat i një helmi me veprim të ngadaltë.

Ruslan Shaveddinov deklaroi javën e kaluar se një ambulancë u thirr në burgun e sigurisë maksimale IK-6 në Melekhov, rreth 250 km në lindje të Moskës, ku ai është i burgosur.

“Situata e tij është kritike, të gjithë jemi shumë të shqetësuar”, tha Shaveddinov Guardian në një intervistë telefonike, raporton theguardian.

Shaveddinov shtoi se situata duhet të ketë qenë shumë e keqe nëse thirrej ndihma dhe autoritetet e burgut refuzuan ta shtronin në spital Navalnyn.

Nuk ka pasur asnjë përditësim për shëndetin e Navalny që nga arritja e ambulancës, tha Shaveddinov, sepse autoritetet e burgut po bëjnë gjithçka që munden për ta izoluar atë. Navalny komunikon me botën e jashtme përmes avokatëve të tij.

Opozitari 46-vjeçar po vuan gjithsej 11 vjet e gjysmë burg për akuzat e mashtrimit dhe përbuzjes së gjykatës, të cilat grupet e të drejtave thonë se ishin të sajuara për t’i mbyllur gojën.

Navalny u helmua me Novichok, agjent nervor i prodhuar nga sovjetikët, në një udhëtim në Siberi në vitin 2020. Ai po trajtohej në Berlin dhe akuzoi presidentin rus, Vladimir Putinin se qëndronte pas sulmit. /Telegrafi/