Kroacia tërheq Rregulloren për kontroll të importit bujqësor

Ministri për bujqësi i Kroacisë, Tomislav Tolušić, sot ka shpallur vendimin për tërheqjen e Rregullores për kontroll fitosanitar të pemëve dhe perimeve që importohen nga vende që nuk janë anëtare të BE-së, rregullore me të cilën çmimet e inspekcioneve u rritën për mbi 22 herë, përcjell Telegrafi Maqedoni.

Vendimi i ministrit Tolušić vjen pas reagimeve të ashpra nga shtetet e Ballkanit Perëndimor, ndër të cilat edhe Maqedonia, vende këto që u goditën në mënyrë direkte nga vendimi i ndryshimit për inspekcione nga ana e shtetit kroat.

Kjo rregullore kishte caktuar një çmim prej 2.000 kuna, gjegjësisht 270 euro për çdo lloj të pemëve dhe perimeve, që në praktikë nënkuptonte se për një kamionetë që në Kroaci transporton pesë lloje të ndryshme të prodhimeve bujqësore do të duhej të paguajë 10.000 kuna, gjegjësisht 1.350 euro.

Në një takim të përbashkët në Sarajevë, ditën e hënë, ministrat për bujqësi të Maqedonisë, Bosnjë dhe Hercegovinës, Serbisë dhe Malit të zi kërkuan që Kroacia në mënyrë urgjente të shfuqizojë rregulloren në fjalë./Telegrafi/