Krasniqi: Masat e reja të Ministrisë së Shëndetësisë të barazvlefshme me puç

Deputeti nga Partia Demokratike e Kosovës, Memli Krasniqi, i ka quajtur masat e reja të prezantuara nga ministri i Shëndetësisë, Arben Vitia, për kufizimin e lëvizjes së lirë në mënyrë që të parandalohet përhapja e COVID-19, si shkelje e rëndë e Kushtetutës.

Ai ka thënë se ky vendim duhet të dërgohet në Gjykatën Kushtetuese pasi që sipas tij, i cenon të drejtat themelore të qytetarëve.

“Ajo që ne dëgjuam dhe pamë është përtej imagjinatës, është një vendim skandaloz i cili pikërisht në ditën kur kë hyrë në fuqi aktvendimi i Gjykatës Kushtetuese, një njësi përbërëse e Qeverisë prezanton masa edhe më të rrepta”.

“Ajo që ndodhi sot është shkelje e Kushtetutës së Kosovës. Për ta bërë edhe më absurde këtë punë, këtë vendim e ka marrë sot Ministria e Shëndetësisë. Kur nga Qeveria merren vendime që i takojnë vetëm Kuvendit; atëherë ky është uzurpim”, ka thënë Krasniqi në Klan Kosova.

“Rekomandimet e profesionistëve shëndetësorë duhet të respektohen, por masat që ndërmerren duhet të jenë në pajtueshmëri me Kushtetutën e Kosovës”.

“Pata rastin që t’i dëgjoj dhe lexoj ata që janë njohës të kësaj fushe, për këtë çështje kishte një pajtim të plotë që e cilësonin këtë vendim si një shkelje e rëndë e Kushtetutës”, tha ai.

Kujtojmë se sot në mbrëmje, ministri i Shëndetësisë Arben Vitia ka mbajtur një konferencë për media, ku ka prezantuar masat e reja që do të hyjnë në fuqi lidhur me parandalimin e përhapjes së COVID-19 në Kosovë.